Recriwtio Cadetiaid Heddlu Gwirfoddol ar draws Wrecsam a Sir y Fflint

Mae pobl ifanc ar draws Wrecsam a Sir y Fflint yn cael eu hannog i wneud cais i ymuno â Chadetiaid Gwirfoddol yr Heddlu wrth i recriwtio agor yn swyddogol ar gyfer aelodau newydd.

Mae Rhaglen Cadetiaid Gwirfoddol yr Heddlu yn cynnig cyfle i bobl ifanc rhwng 13 a 18 oed ddysgu am blismona, datblygu sgiliau bywyd gwerthfawr, helpu eu cymunedau lleol nhw a chymryd rhan mewn ystod eang o weithgareddau a digwyddiadau ochr yn ochr hefo Heddlu Gogledd Cymru.

Mae’r cadetiaid yn cyfarfod pob nos Fawrth ym Mhencadlys Rhanbarthol Llai rhwng 6:30pm a 8pm, lle maen nhw’n cymryd rhan mewn sesiynau ymgysylltu sy’n ymdrin hefo pynciau fel diogelwch cymunedol, gwaith tîm, arweinyddiaeth, cymorth cyntaf, atal trosedd a chyflwyniad i wahanol feysydd plismona.

Mae’r Rhaglen wedi’i chynllunio i ysbrydoli pobl ifanc, meithrin hyder ac annog perthynas gadarnhaol rhwng pobl ifanc a’r heddlu. Mae cadetiaid hefyd yn cael cyfleoedd i wirfoddoli mewn digwyddiadau cymunedol, helpu mentrau lleol a datblygu sgiliau allweddol a all fod o fudd iddyn nhw mewn addysg, cyflogaeth a bywyd bob dydd.

Dywedodd Andrew Harris o’r Tîm Dinasyddiaeth Mewn Plismona: “Mae’r Rhaglen Cadetiaid Gwirfoddol yn rhoi cyfle gwych i bobl ifanc gael profiadau newydd, datblygu sgiliau bywyd pwysig a gwneud cyfraniad cadarnhaol i’w cymunedau nhw. ‘Dydan ni ddim yn chwilio am recriwtio swyddogion heddlu yn y dyfodol ond eisiau rhoi cyfle i bobl ifanc gael eu clywed, helpu’r gymuned a datblygu sgiliau er mwyn dod yn ddinasyddion gwych mewn ffordd hwyliog, gyfeillgar a chyffrous.

“‘Da ni’n falch iawn o agor y broses recriwtio a byddwn ni’n annog unrhyw un sydd hefo diddordeb mewn dysgu mwy am blismona a gwirfoddoli gyflwyno cais.”

Am ragor o wybodaeth ar sut i ymgeisio, ewch ar: Cadetiaid gwirfoddol yr heddlu | Heddlu Gogledd Cymru