Stelcio ac aflonyddu
Yn yr adran yma:
Beth yw stelcio ac aflonyddu?
Stelcio ac aflonyddu yw pan fydd rhywun yn ymddwyn dro ar ôl tro mewn ffordd sy'n gwneud ichi deimlo'n ofnus, yn ofidus neu dan fygythiad. Os yw'r ymddygiad digroeso yma yn digwydd ddwywaith neu fwy, gall fod yn drosedd a gallwch ei riportio i ni.
Os oes rhywun wedi ymddwyn tuag atoch mewn ffordd sydd wedi gwneud ichi deimlo'n ofnus, yn ofidus neu dan fygythiad, a bod hyn wedi digwydd unwaith fe allai fod yn ymddygiad gwrthgymdeithasol, yn drosedd casineb neu’n drosedd arall. Riportiwch y digwyddiad i ni.
Mae stelcio ac aflonyddu yn droseddau o dan Ddeddf Diogelu rhag Aflonyddu 1997. Maen nhw'n droseddau rydyn ni'n eu cymryd o ddifrif ac rydyn ni yma i chi os yw hyn yn rhywbeth rydych chi'n ei brofi.
Mae stelcio ac aflonyddu yn droseddau tebyg iawn. Peidiwch â phoeni os nad ydych chi’n siŵr a ydych chi’n cael eich stelcio ynteu eich aflonyddu. Os byddwch chi’n riportio’r peth i ni, dywedwch beth sydd wedi bod yn digwydd a byddwn ni’n gallu egluro a oes trosedd wedi'i chyflawni a beth yw'r drosedd honno.
Aflonyddu
Gall aflonyddu gynnwys:
- anfon negeseuon testun neu ddelweddau sarhaus
- postio negeseuon sarhaus ar y cyfryngau cymdeithasol
- anghydfodau rhwng cymdogion sy'n cynnwys ymddygiad ymosodol neu ddifrod i eiddo
- ymddygiad gwrthgymdeithasol dro ar ôl tro
- gwneud galwadau ffôn digroeso neu sarhaus
Mae'n aflonyddu os yw'r ymddygiad digroeso wedi digwydd ddwywaith neu fwy ac wedi gwneud ichi deimlo'n ofidus neu dan fygythiad.
Stelcio
Mae stelcio yn fath o aflonyddu, ond bydd gan y stelciwr obsesiwn gyda'r person y mae'n ei dargedu a gall yr ymddygiad digroeso dro ar ôl tro wneud i'r dioddefwr deimlo'n ofidus neu'n ofnus.
Gall stelcio gynnwys:
- dilyn rhywun
- mynd i’w cartref heb wahoddiad
- loetran yn rhywle maen nhw’n gwybod bod y person yn mynd yno’n aml
- gwylio neu sbïo ar rywun
- dwyn hunaniaeth (cofrestru i gael gwasanaethau, prynu pethau yn enw rhywun)
- ysgrifennu neu bostio ar-lein am rywun os yw'n annymunol neu os nad yw'r person yn gwybod
Mae'n stelcio os yw'r ymddygiad digroeso wedi digwydd ddwywaith neu fwy ac wedi gwneud ichi deimlo'n ofnus, yn ofidus neu dan fygythiad.
Stelcio neu aflonyddu ar-lein
Stelcio neu aflonyddu ar-lein yw pan fydd rhywun yn monitro, yn stelcio, yn aflonyddu, yn bygwth, yn rheoli neu’n dynwared person arall drwy ddefnyddio'r rhyngrwyd neu dechnoleg arall.
Gall stelcio neu aflonyddu ar-lein gynnwys:
- monitro defnydd rhywun ar y rhyngrwyd, yr ebost neu gyfathrebiadau electronig eraill
- seiber-fflachio
- cael mynediad at gyfrifon ebost a chyfryngau cymdeithasol rhywun
- sbamio ac anfon feirysau
- dwyn hunaniaeth rhywun
- bygwth rhannu gwybodaeth, ffotograffau, copïau o negeseuon preifat
- ychwanegu meddalwedd olrhain i ddyfeisiau rhywun
Mae'n stelcio neu'n aflonyddu ar-lein os yw'r ymddygiad digroeso wedi digwydd ddwywaith neu fwy ac wedi gwneud ichi deimlo'n ofnus, yn ofidus neu dan fygythiad.
Effaith stelcio ac aflonyddu
Gall y sylw digroeso, ailadroddus gael effaith ddifrifol ar eich iechyd corfforol neu feddyliol, yn ogystal â'ch bywyd o ddydd i ddydd. Mae rhai pobl sydd wedi cael eu stelcio neu eu haflonyddu wedi gorfod gwneud newidiadau i'w bywydau bob dydd; mae rhai wedi newid eu swyddi neu wedi symud tŷ.
Mae'n bwysig eich bod yn cael y cymorth sydd arnoch ei angen os yw hyn yn rhywbeth rydych chi’n ei brofi. Os nad ydych chi'n barod i riportio’r peth i ni, mae hynny'n iawn. Mae yna sefydliadau eraill a all roi cyngor a help ichi.