Carcharu dyn o Gaernarfon a ymosododd ar ei frawd

Mae dyn a ddefnyddiodd ddryll ffug wedi'i addasu er mwyn ymosod ar ei frawd wedi cael ei garcharu.

Ymosododd Jamie Williams, o Dre'r Gof, Caernarfon, ar ei frawd a bygwth pobl eraill ar 18 Ebrill.

Ymddangosodd y dyn 24 oed er mwyn cael ei ddedfrydu yn Llys y Goron yr Wyddgrug ar 15 Mehefin. Roedd hyn ar ôl iddo gyfaddef yn flaenorol ymosod, achosi niwed corfforol a meddu ar ddryll tanio hefo'r bwriad o achosi ofn trais. Gwnaeth hefyd gyfaddef meddu ar ddryll tanio a bwledi heb dystysgrif, addasu dryll tanio ffug yn ddryll tanio defnyddiol a meddu ar ganabis.

Fe wnaeth Williams ddyrnu ei frawd yn ei wyneb sawl gwaith mewn ymosodiad digymell cyn defnyddio dryll tanio ffug er mwyn taro'r dioddefwr yn y pen hefo'r carn.

Er bod ei frawd wedi syrthio'n anymwybodol, parhaodd Williams hefo'r ymosodiad trwy ei ddyrnu a stampio ar ei ben gan achosi anafiadau difrifol.

Yna defnyddiodd y dryll tanio ffug, a oedd wedi'i addasu er mwyn tanio bwledi, i fygwth pobl eraill a oedd yn bresennol a cheisio helpu brawd Williams.

Cafodd ei garcharu am bum mlynedd a saith mis.

Gwnaed gorchymyn fforffedu ar gyfer dinistrio'r gwn, y bwledi a'r canabis.

Dywedodd Ditectif Arolygydd Chris Burrow: "Ymosododd Williams ar ei frawd ei hun, a allai fod wedi arwain at farwolaeth yn hawdd.

"Bydd hyn yn ddi-os yn cael effaith barhaol ar y dioddefwr a'r rhai a welodd yr ymosodiad brawychus hwn.

"Mae digwyddiadau o'r natur hon yn brin iawn yng Ngogledd Cymru. Byddwn yn rhoi sicrwydd i drigolion na fydd cario arfau yn cael eu goddef. Byddwn yn mynd ar drywydd unrhyw wybodaeth a adroddwyd i ni.

"Mae unrhyw un sydd hefo gwybodaeth am y rhai sy'n cario arfau, neu arfau ffug yn gyhoeddus, yn cael eu hannog i gysylltu hefo'r heddlu neu'n ddienw trwy Crimestoppers."