Carcharu dyn yn dilyn gwrthdrawiad a adawodd dyn arall hefo anafiadau sydd wedi newid ei fywyd

Mae dyn wedi cael ei garcharu ar ôl gadael dyn arall hefo anafiadau sydd wedi newid ei fywyd yn dilyn gwrthdrawiad ym Mhrestatyn ym mis Rhagfyr 2020.

Fe ymddangosodd James Price, 41 oed o Tewksbury Road, Caerloyw o flaen Llys Ynadon yr Wyddgrug heddiw (dydd Llun) ar ôl pledio’n euog i achosi anafiadau difrifol drwy yrru’n beryglus.

Cafodd ei garcharu am dair mlynedd a’i wahardd rhag gyrru am bedair blynedd a hanner.

Digwyddodd y gwrthdrawiad ar 9 Rhagfyr 2020 ar Rodfa Bodnant hefo’r gyffordd i Ffordd Nant Hall ym Mhrestatyn rhwng car Peugeot 208 a cherddwr.

Fe stopiodd Price ei gar, llusgo’r cerddwr i ganol y ffordd a gadawodd heb alw am help.

Ar adeg y gwrthdrawiad fe ryddhawyd apêl am dystion gan Heddlu Gogledd Cymru, ac yn dilyn ymchwiliad hir a chymhleth fe gafodd Price ei gyhuddo.

Dywedodd Rhingyll Duncan Logan o Uned Gwrthdrawiadau Difrifol Heddlu Gogledd Cymru: “Mae’r achos hwn yn ein hatgoffa ni’n llwyr sut y gall gyrru peryglus ddinistrio bywydau mewn eiliad. Mae’r dioddefwr yn yr achos hwn wedi dioddef anafiadau i’w goes a newidiodd ei fywyd oherwydd gweithredoedd James Price ac mae ein meddyliau ni’n aros hefo fo a’i deulu.

“Hoffwn ddiolch i bawb a ddaeth ymlaen yn ddewr i roi’r wybodaeth hanfodol yr oedd ei hangen arnon ni i fynd ar drywydd cyhuddiad yn erbyn Price.

“Byddwn ni’n annog pob gyrrwr i feddwl yn ofalus am ganlyniadau eu penderfyniadau nhw wrth y llyw – gall un eiliad fyrbwyll newid bywydau am byth.”