Meithrin perthynas amhriodol

Meithrin perthynas amhriodol yw pan fydd person yn meithrin perthynas â phlentyn, person ifanc neu oedolyn sy’n wynebu risg er mwyn eu cam-drin nhw a dylanwadu arnyn nhw i wneud pethau.

Mae'r gamdriniaeth fel arfer yn rhywiol neu'n ariannol, ond fe all gynnwys gweithredoedd anghyfreithlon eraill hefyd.

Mathau o meithrin perthynas amhriodol

Gall meithrin perthynas amhriodol ddigwydd ar-lein neu'n bersonol a gall ddigwydd dros gyfnod byr neu hir – o ddyddiau i flynyddoedd.

Ar-lein

Mae pobl sy’n meithrin perthynas amhriodol yn dda am ddweud celwydd ynghylch pwy ydyn nhw, yn enwedig ar-lein lle gallan nhw greu hunaniaeth ffug a chymryd arnyn nhw eu bod nhw’n iau nag ydyn nhw.

Gall pobl gael eu meithrin perthynas amhriodol ar-lein drwy’r canlynol:

• rhwydweithiau yn y cyfryngau cymdeithasol
• negeseuon testun ac apiau negeseua, fel WhatsApp
• ebost
• sgyrsiau testun, llais a fideo mewn fforymau, gemau ac apiau

Yn bersonol

Gall person sy’n meithrin perthynas amhriodol fod yn ddieithryn neu'n rhywun mae'r dioddefwr yn eu nabod yn barod ac yn ymddiried ynddyn nhw, er enghraifft drwy ffrind neu deulu, neu mewn clwb maen nhw’n mynd iddo.

Arwyddion meithrin perthynas amhriodol

Mae’n gallu bod yn anodd dweud a ydy rhywun yn cael ei meithrin perthynas amhriodol nid yw’r arwyddion ddim bob amser yn amlwg ac fe allan nhw fod yn gudd.

Dyma rai arwyddion i chwilio amdanyn nhw:

• Ydyn nhw'n gyfrinachol ynglŷn â sut maen nhw'n treulio'u hamser?
• Oes ganddyn nhw gariad hŷn?
• Oes ganddyn nhw arian neu bethau newydd fel dillad a ffonau symudol maen nhw’n methu neu’n gwrthod eu hegluro?
• Ydyn nhw'n yfed neu'n cymryd cyffuriau?
• Ydyn nhw’n treulio mwy neu lai o amser nag arfer ar-lein neu ar eu dyfeisiau?
• Ydyn nhw’n ymddangos yn ofidus neu â’u pen yn eu plu?
• Ydyn nhw'n defnyddio iaith rywiol na fyddech chi'n disgwyl iddyn nhw ei gwybod?
• Ydyn nhw’n treulio mwy o amser oddi cartref neu'n mynd ar goll am gyfnodau?

Fydd person ddim yn gwybod eu bod yn cael eu meithrin perthynas amhriodol. Fe fyddan nhw’n ymddiried yn eu cam-driniwr sy'n rhoi llawer o sylw ac anrhegion iddyn nhw. Hefyd, efallai bod y person sy’n meithrin perthynas amhriodol wedi eu rhybuddio nhw am beidio â dweud wrth neb am y peth.

Riportiwch y peth

Mae meithrin perthynas amhriodol yn drosedd. Os ydych chi'n amau bod rhywun yn cael ei meithrin perthynas amhriodol, hyd yn oed os nad ydych chi'n siŵr, dywedwch wrth rywun.

Os ydych chi'n meddwl eich bod chi’n cael eich meithrin perthynas amhriodol, dylech chi ddweud wrth rywun.