Dedfrydu pumed aelod o Grŵp Troseddau Trefnedig am ymgyrch genedlaethol o ddwyn cerbydau uchel eu gwerth

Dziugas Klinavicius yw’r pumed aelod o grŵp troseddau trefnedig i gael ei garcharu am ei ran mewn ymgyrch dwyn cerbydau heddiw.

Rhwng mis Ionawr a mis Mawrth 2025, targedodd Grŵp Troseddau Trefnedig (OCG) o Lithwania gerbydau gwerth uchel gan ddefnyddio ymosodiadau cyfnewid signal di-allwedd ledled Gogledd Cymru a Swydd Gaer, gan ddwyn wyth cerbyd a cheisio dwyn pum cerbyd arall, gyda chyfanswm gwerth o £320,000.

Roedd y gang yn targedu cerbydau Mercedes a BMW yn bennaf yn ardaloedd Llandudno, Cyffordd Llandudno, Bae Penrhyn, Abergele, y Rhyl, Prestatyn, Northwich a Crewe. Defnyddiwyd offer cyfnewid signal di-allwedd soffistigedig i ryng-gipio signalau a allyrrir gan oriadau ceir y perchnogion o fewn eu heiddo, cyn defnyddio dyfeisiau jamio signal GPS i atal unrhyw dracwyr cerbydau rhag trosglwyddo signal.

Byddai’r troseddwyr yn aml yn gorchuddio camerâu teledu cylch cyfyng a chamerâu drysau â thâp gludiog, ac yn defnyddio platiau cofrestru wedi’u clonio o’r un math a model â’r cerbydau yr oeddent yn eu targedu.

Drwy dystiolaeth DNA a gafwyd o ddarnau o dâp gludiog a adawyd ar gamera teledu cylch cyfyng un dioddefwr, ynghyd â data telathrebu a negeseuon o wasanaethau sgwrsio wedi’u hamgryptio, adnabuwyd y lladron fel Tomas Politovas a Dziugas Klinavicius o Lithiwania.

Pan gafodd cerbyd Mercedes ei ddwyn o gyfeiriad yn Llandudno ar 7 Mawrth 2025, darganfuwyd  fod y cerbyd wedi teithio i ardal Norfolk ar blatiau cofrestru wedi’u clonio.

Pan gynhaliodd swyddogion o Heddlu Norfolk gyrch mewn uned ddiwydiannol yn ardal King’s Lynn yn ddiweddarach yr un diwrnod, canfuwyd y Mercedes wedi’i ddatgymalu’n rhannol, gyda rhannau wedi’u gosod ar baledi a’u lapio’n barod i’w hallforio.

Cafodd tri dyn arall o Lithwania, Rytis Ardavicius, Arnas Jankauskas a Stasys Venckus, eu harestio yn yr uned. Yn ddiweddarach, cawsant eu cyhuddo o gynllwynio i dderbyn nwyddau wedi’u dwyn. Dedfrydwyd Rytis i 46 wythnos o garchar a’i allgludo, Stasys i 27 mis o garchar a’i allgludo, ac Arnas i 27 mis o garchar a’i allgludo.

Bymtheg diwrnod yn ddiweddarach, cafodd troseddwyr a oedd yn ceisio dwyn BMW eu dal yn oriau mân y bore ym Mhrestatyn gan swyddogion lleol ar batrôl.

Aeth y swyddogion ar eu hôl ac, wedi i un ohonynt, Tomas Politovas, gael ei ddal, canfuwyd ei fod yn meddu ar offer jamio signalau, tâp gludiog, platiau cofrestru wedi’u clonio a ffôn symudol.

Cyhuddwyd Politovas o gynllwynio i gyflawni lladradau cerbydau ledled Gogledd Cymru a Swydd Gaer. Roedd ei ffôn symudol yn cynnwys yr allwedd i ap negeseuon wedi’i amgryptio a ddefnyddiwyd gan y grŵp i gyfathrebu, ymchwilio a chynllunio lladradau cerbydau ledled y wlad.

Plediodd Politovas yn euog a dedfrydwyd ef i bedair blynedd o garchar, ac ers hynny mae wedi cael ei allgludo.

Yna lansiwyd ymgyrch genedlaethol i ddal aelod olaf y gang, Dziugas Klinavicius.  Cafodd ei  arestio gan swyddogion o Heddlu Manceinion Fwyaf ar ôl iddo geisio ffoi o gefn tacsi yn ardal Oldham ar 29 Gorffennaf eleni.

Trosglwyddwyd Klinavicius i’r ddalfa yng Ngogledd Cymru a’i gyhuddo o gynllwynio i gyflawni lladradau cerbydau a defnyddio offer i ymyrryd â thelegraffiaeth ddiwifr.

Plediodd yn euog yn Llys y Goron yr Wyddgrug ar 28 Awst 2026 a dedfrydwyd ef heddiw i dair blynedd a naw mis o garchar, gyda’r barnwr yn cyfeirio materion alltudio at y Swyddfa Gartref.

Wrth siarad ar ôl y ddedfryd, dywedodd y Ditectif Gwnstabl Ash Davies:

“Roedd hwn yn ymchwiliad hir a chymhleth, ac roedd Klinavicius wedi chwarae rhan ganolog yng ngweithgarwch troseddol y gang.

“Mae’r ddedfryd a osodwyd ar Klinavicius heddiw yn adlewyrchu difrifoldeb ei droseddau.

“Mae troseddau er elw yn parhau’n flaenoriaeth i’r heddlu oherwydd ein bod yn gwybod am yr effaith ddinistriol ar ddioddefwyr.

“Fel yn yr achos hwn, byddwn yn parhau i chwalu’r grwpiau troseddau trefnedig sydd y tu ôl i ladradau ceir drwy adnabod y bobl, y patrymau troseddu a’r lleoliadau sy’n gysylltiedig â’r troseddau hyn, a gweithio gyda chydweithwyr mewn heddluoedd eraill, gan ddangos na fyddwn yn stopio ar unrhyw gyfrif i fynd i’r afael â’r broblem hon.”