Gwrthdrawiad angheuol yn Llandudno: Apêl

Mae ymchwiliad ar y gweill yn dilyn gwrthdrawiad traffig ffordd angheuol yn Llandudno neithiwr (nos Iau, 29ain o Hydref).

Derbyniodd Heddlu Gogledd Cymru adroddiad am 10:31pm am wrthdrawiad hefo beic modur du ar Marine Drive, tua milltir o’r Tollty i gyfeiriad copa’r Gogarth.

O ganlyniad i’r gwrthdrawiad, aeth y beiciwr modur i mewn i’r môr islaw’r Gogarth.

Lansiwyd ymateb aml-asiantaeth yn cynnwys Heddlu Gogledd Cymru, Gwylwyr y Glannau a’r RNLI.

Cafodd y beiciwr ei ddarganfod yn y dŵr a’i gludo mewn hofrennydd Gwylwyr y Glannau i Ysbyty Gwynedd ym Mangor.

Er gwaethaf ymdrechion gorau’r gwasanaethau brys, cyhoeddwyd ei fod wedi marw. Mae ei berthnasau agosaf wedi cael eu hysbysu ynghyd â’r crwner.

Mae Rhingyll Alun Jones o Uned Troseddau’r Ffyrdd Heddlu Gogledd Cymru yn apelio am dystion. Meddai: “Mae hyn bellach yn cael ei drin fel gwrthdrawiad traffig ffordd angheuol, ac mae ein meddyliau gyda theulu a ffrindiau’r dyn ar yr adeg anodd hwn.

“Rydym yn annog unrhyw un a allai fod wedi gweld y gwrthdrawiad, neu unrhyw un a oedd yn teithio neu’n cerdded ar hyd Marine Drive ar nos Iau, 29ain o Hydref, i gysylltu â ni.

“Rydym yn arbennig o awyddus i glywed gan unrhyw un a oedd yn teithio o gyfeiriad y Tollty i gopa’r Gogarth rhwng 10pm a 10:30pm ac allai fod â ffilm camera dashfwrdd.

“Gall unrhyw wybodaeth,  waeth pa mor ddibwys y mae’n ymddangos, fod o gymorth gyda’n hymchwiliad.”

Dylai unrhyw un sydd â gwybodaeth gysylltu â swyddogion o Uned Plismona’r Ffyrdd drwy’r sgwrs fyw ar wefan Heddlu Gogledd Cymru, neu drwy ffonio 101, gan roi’r rhif cyfeirnod 26000888717.