Carcharu dyn am geisio treisio plentyn

Mae dyn wedi cael ei garcharu am geisio treisio plentyn.

Ymddangosodd Ryan Williams, 37, o Hendre, Corwen, yn Llys y Goron Caernarfon i'w ddedfrydu heddiw, dydd Gwener 6 Mawrth.

Cafwyd ef yn euog o geisio treisio merch ifanc yn Wrecsam, yn dilyn achos yn Llys y Goron Caernarfon ym mis Ionawr.

Cafodd Williams ei garcharu am 11 mlynedd, gyda chyfnod trwydded estynedig o bedair blynedd. Cafodd hefyd orchymyn atal niwed rhywiol am 25 mlynedd ac yn amodol ar ofynion hysbysu am oes.

Rhoddwyd gorchymyn atal oes ar waith hefyd i ddiogelu'r dioddefwr.

Dywedodd y Ditectif Rhingyll Keegans: "Yng nghanol yr achos hwn mae merch ifanc ac rwy'n ei chanmol am ei dewrder yn riportio Williams i'r heddlu. Mae hyn wedi arwain at ei euogfarnu a heb amheuaeth wedi amddiffyn plant eraill rhag niwed.

"Ni ddangosodd Williams unrhyw edifeirwch am y drosedd gan orfodi'r ferch i ail-fyw ei phrofiadau mewn achos llys.

"Rwy'n gobeithio y bydd yr achos hwn yn annog eraill sydd wedi bod yn destun cam-drin rhywiol i ddod ymlaen a chael sicrwydd y bydd eu tystiolaeth yn cael ei chlywed ac yn rhybuddio unrhyw droseddwr rhywiol y byddant yn wynebu canlyniadau am eu gweithredoedd.

"Mae mynd i'r afael â thrais yn erbyn menywod a merched yn parhau i fod yn flaenoriaeth i Heddlu Gogledd Cymru."

Am ragor o wybodaeth a manylion am asiantaethau cymorth sydd ar gael, ewch i'n gwefan: Sefydliadau cymorth | Cam-drin plant | Heddlu Gogledd Cymru