Gwasanaeth BSL newydd yn helpu pobl fyddar gysylltu efo’r heddlu ar 101

Mae gwasanaeth newydd ar gael i’r gymuned fyddar a nam ar y clyw er mwyn cysylltu efo Heddlu Gogledd Cymru gan ddefnyddio Iaith Arwyddion Prydain (BSL).

Enw’r gwasanaeth newydd ydy Convo Now.

Mae’n helpu defnyddwyr BSL gysylltu efo’r heddlu ynglŷn â phroblemau di-frys, gan ddefnyddio cyfieithydd ar y pryd ar fideo byw.

Mi allwch chi ddefnyddio’r ap neu wefan Convo Now er mwyn cysylltu efo’r heddlu.

Mae’r gwasanaeth yn rhad ac am ddim ac ar gael 24 awr y dydd, 7 diwrnod yr wythnos.

Mi wnaiff cyfieithydd ar y pryd BSL hyfforddedig ymuno efo’r fideo a chyfathrebu efo’r heddlu ar eich rhan chi.

Mae’r gwasanaeth ar ben y llinell neges testun sydd ar gael yn barod, lle gellir defnyddwyr siarad efo gweithredwr drwy neges testun ar 18001 101.

Mi allwch chi ddefnyddio Convo er mwyn:

• Riportio trosedd di-frys
• Riportio rhywbeth sydd wedi digwydd eisoes
• Gofyn i’r heddlu am gyngor
• Cysylltu efo’ch swyddog heddlu neu SCCH lleol chi

Er mwyn defnyddio’r gwasanaeth am y tro cyntaf, mae’n rhaid i chi gofrestru efo Convo.

Dywedodd Rheolwr Ystafell Reoli Heddlu Gogledd Cymru, David McMahon: “’Da ni eisiau i bobl fyddar a defnyddwyr BSL gysylltu efo ni’n hawdd a hyderus pan maen nhw angen help.

“Mae Convo yn rhoi gwell mynediad i bobl i’n gwasanaeth heddlu ni pan nad oes argyfwng.

“’Da ni’n ymroddgar i helpu pobl fyddar a phobl efo nam ar y clyw yn ein cymuned ni.

“Mae’r gwasanaeth hwn yn gam tuag at feithrin cynhwysiant pellach a gwneud Gogledd Cymru’r lle mwyaf saff i fyw, gweithio ac ymweld yn y DU.”

Dywedodd Comisiynydd Heddlu a Throsedd Gogledd Cymru, Andy Dunbobbin: “Fel CHTh, dwi’n credu dylai pawb fedru cysylltu efo’r heddlu gyda hyder, ac mae mentrau fel hon yn helpu chwalu rhwystrau cyfathrebu a chadw pobl yn saff.

“Drwy wella hygyrchedd, ‘da ni’n cryfhau ymddiriedaeth, sicrhau tegwch, ac yn sicrhau bod pawb yn cael mynediad i’r help maen nhw ei hangen.”

Dywedodd Steph Lotz, Rheolwr Cyffredinol y DU Convo: “’Da ni’n credu dylai pobl fyddar allu ymgysylltu efo gwasanaethau cyhoeddus yn hyderus ac annibynnol, yn enwedig ar adegau pan mae ymddiriedaeth, diogelwch ac eglurdeb yn hynod o bwysig.

“’Da ni’n falch bod yn bartner efo Heddlu Gogledd Cymru er mwyn helpu creu llwybrau mwy uniongyrchol er mwyn i ddefnyddwyr byddar Iaith Arwyddion Prydain gysylltu gyda mwy o hyder a hwyluster.”

Er mwyn cofrestru am ddim:

• Lawrlwythwch yr ap Convo Now
• Neu ewch ar wefan Convo: Convo Now | Login

Yn y dyfodol, ‘da ni’n gobeithio defnyddio Convo mewn ychwaneg o ffyrdd er mwyn helpu pobl fyddar.

Mi wnaiff hyn gynnwys:

• Wrth gownteri blaen gorsafoedd heddlu
• Yn nalfeydd yr heddlu
• Efo swyddogion yr heddlu yn y gymuned

Mi wnawn ni eich diweddaru chi pan mae’r gwasanaethau ychwanegol hyn ar gael.

Mewn argyfwng, mi all pobl fyddar ddefnyddio’r gwasanaeth 999 BSL o hyd.