Man charged in connection with fatal collision in Wrexham

Mae dyn 28 oed wedi cael ei gyhuddo mewn cysylltiad hefo gwrthdrawiad angheuol yn Hightown, Wrecsam.

Mae Michael Connors, o Landen Road, Ballyfermot, Dulyn, wedi'i gyhuddo o achosi marwolaeth trwy yrru'n beryglus a dau gyhuddiad o achosi anaf difrifol trwy yrru'n beryglus.

Digwyddodd y gwrthdrawiad toc ar ôl 9.30pm ar 24 Mawrth 2025 rhwng Ffordd Belgrave a Ffordd Percy wrth i gar Mercedes arian ffoi rhag yr heddlu a gwrthdaro hefo car Toyota.

Gadawodd dau ddyn, gyrrwr a theithiwr y Mercedes arian, fan a lle'r gwrthdrawiad.

Yn anffodus, bu farw Lydia La Polla, 47, o Wrecsam, gyrrwr y car Toyota, o'i hanafiadau yn yr ysbyty ddau ddiwrnod yn ddiweddarach ar 26 Mawrth 2025.

Cafodd ei gŵr, teithiwr yn y car Toyota, ei anafu'n ddifrifol.

Cafodd teithiwr 16 oed yn y car Mercedes ei anafu'n ddifrifol hefyd.

Cafodd Connors ei estraddodi i'r DU ddydd Mawrth, 16 Mehefin ar ôl cael ei arestio gan y Garda yn Nulyn, Iwerddon ar 11 Mawrth 2026, mewn cysylltiad hefo'r gwrthdrawiad.

Cafodd ei gyhuddo yn ddiweddarach gan Heddlu Gogledd Cymru ar ddydd Mawrth, 16 Mehefin ac ymddangosodd gerbron Llys Ynadon Llandudno ar ddydd Mercher, 17 Mehefin.

Cafodd ei gadw yn y ddalfa i ymddangos gerbron Llys y Goron yr Wyddgrug ar 17 Gorffennaf.

Dywedodd Prif Uwcharolygydd Jaqueline Downes: "Mae ein cydymdeimlad dwysaf yn parhau i fod hefo teulu Lydia La Polla yn dilyn eu colled drasig.

"Byddwn ni'n parhau i'w helpu nhw trwy bob cam o'r ymchwiliad a'r achos llys sydd i ddod.

"Gan fod hwn yn parhau i fod yn ymchwiliad sydd ar waith o hyd, mae'n bwysig nad ydy pobl yn dyfalu am y digwyddiad ar-lein."