Gang members jailed for Flintshire drug supply operation

Mae aelodau o Gang Troseddau Trefnedig (OCG) a drefnodd gyflenwad ar raddfa fawr o gyffuriau Dosbarth A a B i Sir y Fflint wedi cael eu carcharu.

Canfuwyd bod cyfanswm o wyth unigolyn, rhai ohonynt yn perthyn i'w gilydd, yn rhan o'r ymgyrch. Ymddangosodd yr wyth yn Llys y Goron, yr Wyddgrug i gael eu dedfrydu ar 22 Ionawr.

Cyhuddwyd pawb am eu rhan yn y cynllwyn i gyflenwi cocên, cetamin a chanabis.

Hefo'i gilydd, derbyniodd y diffynyddion dros 47 o flynyddoedd yn y carchar.

Mae eu heuogfarnau nhw'n dilyn ymchwiliad manwl a hirfaith gan Uned Troseddau Difrifol a Threfnedig Heddlu Gogledd Cymru.

Canolbwyntiodd 'Ymgyrch Zero' ar weithgareddau troseddol y gang rhwng Rhagfyr 2022 a Thachwedd 2023.

Yn ystod y cyfnod hwn, casglwyd cudd-wybodaeth helaeth gan swyddogion.

Roedd yr ymchwiliad yn canolbwyntio ar eu gweithgareddau a’u bywydau o fewn y rhwydwaith troseddol.

Cadarnhawyd mai Lee Rigby, 42 oed o Station Rd, Sandycroft oedd yn arwain gweithgareddau anghyfreithlon y gang, gan brynu cocên, cetamin a chanabis gan gyflenwyr a threfnu gwerthu'r sylweddau ar raddfa fasnachol.

Adnabu Ymgyrch Zero sawl person arall o fewn y rhwydwaith troseddol ehangach, pob un ohonynt gyda chyfrifoldebau gwahanol o fewn yr OCG.

Yn cynorthwyo Rigby roedd Mark Poh, 42, a oedd yn byw gydag ef yn Station Road, Sandycroft. Poh oedd yn gyfrifol am bwyso a phecynnu'r sylweddau anghyfreithlon, cyn i'r pâr wedyn eu dosbarthu'n lleol trwy gyflenwyr dibynadwy.

Cafodd ei weld hefyd mewn sawl cyfarfod gyda chyflenwyr Rigby yn trosglwyddo arian am y cyffuriau.

Daniel Carroll, 33, o Engfield Avenue, Cei Connah, sef hanner brawd Rigby, oedd yn ariannu'r busnes, gan roi arian parod i Rigby i brynu'r cyffuriau yn gyfnewid am elw.

Byddai Carroll hefyd yn casglu arian ar ran eraill ar gyfer Rigby ac yn defnyddio ei gartref fel storfa ddiogel ar gyfer yr arian.

Roedd mab 21 oed Rigby, Wesley Rigby, o Faes Glyndŵr, Treuddyn, a Frank Jones, 35, o Cornist Lane, y Fflint, yn ddau o brif gyflenwyr Rigby.

Roedd gan Jack Harpur, 31, o Sandy Lane, Glannau Dyfrdwy, rôl amrywiol o fewn y cynllwyn, yn defnyddio ei gartref yn bennaf i storio arian parod a chyflenwi swm llai o gyffuriau i Poh.

Mewn gwrandawiad yn Llys y Goron yr Wyddgrug ar 12 Mai 2025, dedfrydwyd Katie Williams, 35 oed, o Deva Avenue, Cei Connah a Claire Clegg, 43 oed, o Chevrons Road, Shotton, am gynorthwyo'r gang drwy storio arian yn eu cartrefi.

Dedfrydwyd Jessica Lett, 38 oed, o Chevrons Road, Shotton, hefyd am gyflenwi cocên a chanabis.

Rhoddwyd gorchymyn cymunedol 12 mis i'r tair gyda'r amod bod yn rhaid iddynt wneud 15 diwrnod o weithgaredd adsefydlu.

Dywedodd yr Uwch Swyddog Ymchwilio, y Ditectif Brif Arolygydd Richard Sidney: "Mae cyffuriau yn difetha bywydau, yn difetha cymunedau, ac yn dod â diflastod i ddefnyddwyr a'u teuluoedd.

"Mae'r ymchwiliad hwn wedi datgymalu rhwydwaith cyflenwi sefydledig yn Sir y Fflint ac mae hynny'n dyst i waith diwyd yr heddlu a sgiliau arbenigol tîm mawr o swyddogion sy'n gweithio o fewn ein tîm Troseddau Difrifol a Threfnedig.

"Dylai canlyniad heddiw hefyd anfon neges glir i'r rhai sy'n ymwneud hefo troseddau trefnedig y byddwn ni'n parhau i gymryd camau pendant i ddatgymalu troseddau trefnedig a'r rhwydweithiau troseddol sy'n gysylltiedig â nhw.

"Bydd mynd i'r afael â chyflenwi cyffuriau yn parhau i fod yn flaenoriaeth i Heddlu Gogledd Cymru, ond ni allwn wneud hyn heb gymorth parhaus ein cymunedau.

"Os oes gennych wybodaeth am gyflenwi cyffuriau yn eich ardal, cysylltwch â ni, neu rhowch wybod yn ddienw trwy'r elusen annibynnol Crimestoppers fel y gallwn weithredu."

 

Dyma restr lawn o'r diffynyddion a'u dedfrydau:

• Lee Rigby, 42, o Station Road, Sandycroft – 16 mlynedd am gynllwynio i gyflenwi cyffuriau Dosbarth A a B.

• Mark Poh, 42, of Station Road, Sandycroft – 14 mlynedd am gynllwynio i gyflenwi cyffuriau Dosbarth A a B.

• Adam Hill, 39, of Upper Aston Hall Lane, Hawarden – Pump mlynedd a wyth mis am gynllwynio i gyflenwi cyffuriau Dosbarth A a meddiant gyda'r bwriad o gyflenwi cyffuriau Dosbarth A.

• Frank Jones, 35, of Cornist Lane, Flint - Pump mlynedd a deg mis am gynllwynio i gyflenwi cyffuriau Dosbarth A a B.

• Stephen Lowe, 32, of Woodfield Avenue, Flint - Pump mlynedd a deg mis am gynllwynio i gyflenwi cyffuriau Dosbarth A a B.

• Wesley Rigby, 21, of Maes Glyndwr, Treuddyn– Dwy flynedd, wedi’u gohirio am ddwy flynedd, am gynllwynio i gyflenwi cyffuriau Dosbarth A a B.
• Daniel Carroll, 33, of Engfield Avenue, Connah’s Quay – Chwe mis, wedi’u gohirio am 2 flynedd, am drosglwyddo eiddo troseddol.
• Jack Harpur, 31, of Sandy Lane, Broughton– Dwy flynedd wedi’u gohirio am gynllwynio i gyflenwi cyffuriau Dosbarth A.