Ymgyrch Tramline yn tynnu sylw at y defnydd parhaus o ffonau symudol tra'n gyrru

Fe wnaeth swyddogion heddlu yng Ngogledd Cymru stopio bron i 50 o yrwyr fel rhan o ymdrech barhaus i wella diogelwch ar rai o ffyrdd prysuraf y rhanbarth.

Cymerodd swyddogion o'r Uned Troseddau Ffyrdd ran yn Ymgyrch Tramline, menter plismona ffyrdd cenedlaethol sy'n defnyddio cerbyd nwyddau trwm heb ei farcio wedi ei ddarparu gan Briffyrdd Cenedlaethol. Mae'r uned HGV arbenigol yn cael ei defnyddio gan heddluoedd ledled y DU i batrolio rhwydweithiau ffyrdd allweddol, gan dargedu pob modurwr, gan gynnwys gyrwyr cerbydau masnachol.

Mae safle uchel y cab HGV yn rhoi golwg glir i swyddogion hyfforddedig o gerbydau sy'n pasio, gan ganiatáu iddynt ganfod ymddygiad gyrru peryglus. Mae troseddau yn cael eu dal ar gamera mewn amser real a'u trosglwyddo i gydweithwyr mewn cerbydau heddlu wedi'u marcio a heb eu marcio. Yna, maent yn stopio'r gyrwyr ac yn delio â'r troseddau fel bo'r galw.

Dywedodd Rhingyll Danny Rees o'r Uned Troseddau Ffyrdd: "Nododd swyddogion ychydig o dan 50 o droseddau yn ystod eu patrolau gan gynnwys defnyddio ffôn symudol, methu â gwisgo gwregys diogelwch, llwythi ansicr a gyrru heb ofal a sylw dyledus - i enwi ond ychydig. Gwelwyd unigolyn gydag un droed ar y dangosfwrdd, yn gwylio ffilm ar eu ffôn a wyrodd o flaen yr HGV heb ei farcio.

Mae cadw ein ffyrdd yn ddiogel yn parhau i fod yn brif flaenoriaeth i Heddlu Gogledd Cymru, ac mae nifer y troseddau a nodwyd yn dangos pam mae gweithrediadau rhagweithiol fel hyn mor bwysig.

"Mae defnyddio ffôn symudol wrth yrru a pheidio â gwisgo gwregys diogelwch ill dau yn rhan o'r '5 angheuol' - prif achosion gwrthdrawiadau difrifol ac angheuol ar ein ffyrdd. Siom oedd gweld bod y rhain ymhlith y troseddau mwyaf cyffredin a ganfuwyd. Mae dewis cyflawni un o'r troseddau 5 angheuol yn rhoi nid yn unig y gyrrwr mewn perygl, ond hefyd defnyddwyr eraill y ffordd.

"Nid dyma'r tro cyntaf i ni ddefnyddio'r Ymgyrch Tramline HGV, ac nid hwn  fydd yr olaf. Rydym yn ddiolchgar i Briffyrdd Cenedlaethol am eu cefnogaeth barhaus wrth ddarparu'r cerbyd. Bydd gweithrediadau fel hyn yn parhau i dargedu'r rhai sy'n rhoi eraill mewn perygl trwy yrru'n beryglus. Cymerwch hyn fel rhybudd a meddyliwch yn ofalus am eich gweithredoedd y tu ôl i'r llyw."

Yn ystod yr ymgyrch, cofnodwyd cyfanswm o 49 o droseddau, gan gynnwys:

• 22 gyrrwr heb wisgo gwregysau diogelwch
• 11 gyrrwr yn defnyddio ffôn symudol wrth yrru
• 4 trosedd gofal dyledus
• 4 llwyth ansicr
• 3 Trosedd adeiladu a defnyddio

Nodiadau:

• Cynhaliwyd Ymgyrch Tramline ym mis Rhagfyr 2025 lle cyhoeddwyd 57 o droseddau, gan gynnwys gyrru wrth ddefnyddio ffôn symudol, gyrru heb wregys diogelwch a gyrru o dan ddylanwad cyffuriau.

• Dros sawl diwrnod ym mis Awst 2025 y llynedd, datgelwyd bron i 90 o droseddau gan gynnwys gyrru wrth ddefnyddio ffôn symudol, gyrru heb wregys diogelwch a llwythi annormal - a arweiniodd hefyd at droseddau eraill gan gynnwys dim yswiriant a theiars diffygiol
• Ym mis Chwefror 2026 nododd yr ymgyrch 48 o droseddau tebyg pellach.

Mae rhagor o wybodaeth am Ymgyrch Tramline ar gael ar wefan y Priffyrdd Cenedlaethol: Tackling dangerous driving behaviour - National Highways