#GwarchodParchuMwynhau – Ymgyrch Bang 2025
Cynnwys y prif erthygl
Hefo Calan Gaeaf a Noson Tân Gwyllt yn prysur agosáu, mae Heddlu Gogledd Cymru yn cydweithio'n agos hefo partneriaid, gan gynnwys Gwasanaeth Tân ac Achub Gogledd Cymru ac awdurdodau lleol er mwyn helpu pawb fwynhau'r dathliadau yn saff ac yn gyfrifol.
Er bod yr adeg hon o'r flwyddyn yn uchafbwynt i lawer, gall hefyd ddod â heriau. Bob blwyddyn, mae'r gwasanaethau brys yn gweld cynnydd mewn galwadau sy'n gysylltiedig hefo ymddygiad gwrthgymdeithasol. Dyna pam 'da ni'n gofyn i rieni a gofalwyr siarad hefo'u plant am ddathlu'n synhwyrol a meddwl am effaith yr hyn maen nhw'n ei wneud. Gall yr hyn a allai ymddangos fel hwyl ddiniwed achosi gofid go iawn i bobl eraill a gallai gael canlyniadau parhaol.
Fel rhan o Ymgyrch Bang, mae swyddogion o Dimau Plismona Cymdogaethau ar draws Gogledd Cymru eisoes wedi bod yn sgwrsio hefo pobl ifanc mewn ysgolion a chlybiau ieuenctid. Mae cyllid gan Ymddiriedolaeth Heddlu Gogledd Cymru a'r Gymuned (PACT) yn helpu ystod o weithgareddau. Mae'r ymgyrch hefyd yn hyrwyddo negeseuon diogelwch a pharch allweddol, gan atgoffa pawb na fydd ymddygiad gwrthgymdeithasol yn cael ei oddef.
Mae siopau hefyd yn cael eu hannog i beidio â gwerthu blawd ac wyau i blant sydd ar eu pen eu hunain wrth i Galan Gaeaf nesáu.
Dywedodd Arolygydd Claire McGrady: "Dylai Calan Gaeaf a Noson Tân Gwyllt fod yn ymwneud â hwyl, nid ofn. Mae'r rhan fwyaf o bobl yn dathlu gan ystyried pobl eraill. Ond yn anffodus mae lleiafrif bach yn defnyddio'r dathliadau fel esgus i achosi aflonyddwch a throseddu. 'Da ni'n gofyn i bawb feddwl cyn gweithredu, parchu eu cymdogion nhw, a'n helpu ni wneud yn siŵr bod Gogledd Cymru yn parhau bod yn lle saff a chroesawgar i bawb.
Bydd ein swyddogion a'n partneriaid ni allan ledled y rhanbarth yn cynnig sicrwydd, yn sgwrsio hefo cymunedau, a gweithredu lle bo angen. Hefo'n gilydd mi fedrwn ni warchod, parchu a mwynhau'r adeg hon o'r flwyddyn."
Er mwyn helpu lleihau'r galw am wasanaethau brys yn ystod y cyfnod prysur hwn, 'da ni'n gofyn i'r cyhoedd wneud yn siŵr eu bod nhw'n cysylltu hefo'r asiantaeth iawn yn y ffordd iawn:
- Am bryderon am ymddygiad gwrthgymdeithasol neu ddiogelwch y cyhoedd, cysylltwch hefo'r heddlu. Defnyddiwch ein gwefan ni ar gyfer achosion sydd ddim yn argyfwng – Hafan | Heddlu Gogledd Cymru
- Dylid rhoi gwybod i'r awdurdod lleol am broblemau ynghylch sŵn a gwerthu tân gwyllt a thaflu sbwriel/tipio anghyfreithlon. Ein partneriaid | Heddlu Gogledd Cymru
'Da ni hefyd wedi creu posteri ar gyfer preswylwyr sy'n well ganddyn nhw beidio â chael rhai'n galw'n chwarae cast neu geiniog. Gellir lawrlwytho'r rhain o'n gwefan ni a'u hargraffu nhw ar eich cyfer chi'ch hun, perthnasau oedrannus neu gymdogion. Parchwch unrhyw aelwyd sy'n arddangos un o'r posteri hyn.
Cyfarchion gan Heddlu Gogledd Cymru – gobeithio cewch Galan Gaeaf a Noson Tân Gwyllt saff a dymunol a gofalwch am eich gilydd.
Mae rhagor o wybodaeth am PACT ar gael ar: Ymddiriedolaeth Heddlu Gogledd Cymru a'r Gymuned
Gallwch gael y wybodaeth ddiweddaraf am yr hyn y mae eich tîm plismona lleol yn ei wneud dros Galan Gaeaf a Noson Tân Gwyllt trwy ddilyn yr hashnod #YmBang25