Heddlu’n parhau i dargedu gyrwyr heb yswiriant

Mae ymgyrch sy’n targedu gyrwyr heb yswiriant ar ffyrdd Gogledd Cymru ers dechrau’r mis yn parhau.

Ar 1 Tachwedd daeth Heddlu Gogledd Cymru y heddlu cyntaf yng Nghymru i ymuno hefo Ymgyrch Scalis, sef ymgyrch cenedlaethol wedi’i harwain gan yr MIB (Biwro Yswirwyr Moduron) er mwyn taclo’r rhai sy’n gyrru heb yswiriant.

Ar ddyddiau gorfodi pwrpasol mae swyddogion o’r Uned Troseddau Ffyrdd wedi bod ar batrôl yn defnyddio technoleg Adnabod Rhifau Awtomatig (ANPR) i nodi cerbydau sy’n cael eu gyrru heb yswiriant a chymryd camau gorfodi priodol.

Hefo help ariannol gan yr MIB, mae swyddogion wedi bod yn canolbwyntio ar ardaloedd hefo lefelau uchel o yrru heb yswiriant, a nodwyd drwy ddata hawliadau gwrthdrawiadau heb yswiriant. Mae hyn wedi arwain at atafaelu 14 o gerbydau.

Cafodd problemau eu canfod hefo rhai o’r cerbydau a gafodd eu stopio, gan gynnwys gyrrwr newydd a gafodd ei drwydded yswiriant ei ganslo oherwydd nad oedd yn cydymffurfio hefo telemateg, canfuwyd bod gyrrwr wedi’i wahardd rhag gyrru yn gyrru heb yswiriant dilys a atafaelwyd tryc casglu ar ôl i’w yrrwr ddefnyddio polisi masnach modur personol y tu allan i’r amodau a ganiateir.

Rhwng Tachwedd y 1af a 25ain mae Heddlu Gogledd Cymru wedi atafaelu 136 cerbyd dan Ddeddf 165.

Dywedodd Rhingyll Alun Jones o’r Uned Troseddau Ffyrdd, sy’n arwain ar y fenter ar ran Heddlu Gogledd Cymru: “Mae lleihau’r nifer o bobl sy’n cael eu lladd neu eu hanafu’n ddifrifol ar ein ffyrdd ni’n flaenoriaeth i ni. Mae tynnu gyrwyr heb yswiriant oddi ar ein ffyrdd ni’n ein helpu ni efo hynny. Rydym yn falch iawn o fod yn rhan o Ymgyrch Scalis yr MIB – menter ANPR rhagweithiol sy’n gwella diogelwch ar y ffyrdd ac yn lleihau’r effaith ariannol ar fodurwyr sy’n glynu at y gyfraith ar draws Gogledd Cymru.

“Wrth gwrs ‘da ni’n patrolio ffyrdd Gogledd Cymru 24 awr y dydd, saith diwrnod yr wythnos ac fe wnawn ni ddelio hefo beth bynnag ddown ni ar ei draws – mae hwn yn ymwneud â diogelu pawb ar y ffyrdd. ‘Da ni’n gwybod bod cysylltiad clir rhwng gyrwyr heb yswiriant a throsedd ac mae gan weithrediadau fel hyn ran pwysig i’w chwarae i wneud ein ffyrdd yn saffach i bawb.

“Er mai cerbydau heb yswiriant ydy’r prif darged, mae unrhyw weithgaredd troseddol ychwanegol a ddarganfyddir hefyd yn cael ei ymdrin hefo hi – ‘da ni eisoes wedi gweld troseddau megis gyrru ar gyffuriau, gyrru o dan waharddiad, meddu ar gyffuriau a gyrru heb fod yn unol â thrwydded.

“’Da ni’n deall y gall camgymeriadau gwirioneddol ddigwydd weithiau o ran polisïau yswiriant, ond mae angen i yrwyr gymryd cyfrifoldeb personol, a chyn dreifio, gwirio eu polisi a sicrhau eu bod wedi yswirio’n llawn cyn dechrau ar eu taith.”

Ynghyd â gorfodi, mae Ymgyrch Scalis hefyd yn ceisio addysgu gyrwyr am ganlyniadau difrifol gyrru heb yswiriant. Mae’r rhain yn cynnwys:

• Cosb ariannol £3,000
• Chwe phwynt cosb, sy’n gallu arwain at waharddiad awtomatig i yrwyr newydd
• Cerbyd yn cael ei atafaelu a’i ddinistrio o bosibl
• Dirwyon anghyfyngedig a gwaharddiadau gyrru trwy atgyfeiriad llys
• Cynnydd cyfartalog o £1,000 mewn prisiau yswiriant yn y dyfodol

Ychwanegodd Rhingyll Jones: “Mae ein neges yn un syml, os ydych yn gyrru heb yswiriant, bydd yn barod i ni atafaelu eich cerbyd chi a byddwch chi’n wynebu dirwy a phwyntiau cosb ar eich trwydded chi.”

Er mwyn gweld os mae eich cerbyd chi hefo yswiriant, ewch ar Navigate, y cofnod canolog o’r holl bolisïau yswiriant byw a weithredir gan yr MIB – www.checkyourvehicle.org.uk