Carchar i ddau ddyn wedi’u dal yn gwerthu cyffuriau ar Ynys Môn

Mae dau ddyn wedi’u carcharu ar ôl cael eu dal yn cyflenwi cyffuriau ar Ynys Môn.

Mi ymddangosodd Tom Brabbins, 32 oed, o Brodie Avenue, Cressington, Lerpwl a Jamie Weston, o Barbrook Avenue, Lerpwl yn Llys y Goron yr Wyddgrug ar ddydd Llun, 17 Mawrth, lle wnaethon nhw gyfaddef ymwneud â chyflenwi cocên.

Rhwng mis Tachwedd 2024 a mis Chwefror 2025, mi deithiodd Brabbins a Weston o Lannau Mersi i Ogledd Cymru er mwyn gwerthu cyffuriau Dosbarth A.

Mi wnaethon nhw ddefnyddio ffôn symudol er mwyn anfon neges swmp i ddefnyddwyr cyffuriau hysbys, yn cynnig eu cyflenwi efo cocên.

Mi gyflawnodd swyddogion warant mewn cyfeiriad yn Amlwch ar 10 Chwefror, ac o ganlyniad mi arestiwyd y ddau ddyn o Lerpwl.

Mi gafodd Brabbins ei garcharu am bedair blynedd, ac mi gafodd Weston ei garcharu am dair blynedd a naw mis.

Mi dderbyniodd Weston hefyd Orchymyn Ymddygiad Troseddol sy’n para tair blynedd ar ôl iddo gael ei ryddhau o’r carchar, sy’n ei atal rhag ymweld ag Ynys Môn.

Dywedodd y Ditectif Ringyll Arron Hughes: “Ni wnawn ni oddef y rhai sy’n dod â chyffuriau i Ynys Môn, er mwyn tarfu ar unigolion bregus ac achosi niwed i’r gymunedau.

“Mi fuaswn i’n annog unrhyw un efo gwybodaeth ynglŷn â chyffuriau yn eu hardal i riportio’u pryderon nhw i’r heddlu, neu’n ddienw drwy Crimestoppers.”