Cynnal ymgyrch diogelwch y ffyrdd yn Y Fflint

Cafodd profion golwg a gwiriadau diogelwch y ffyrdd eu cynnal yn Y Fflint ddoe (dydd Llun) fel rhan o ymgyrch diogelwch y ffyrdd gan swyddogion o Uned Troseddau’r Ffyrdd.

Bu Ymgyrch Eyesight, a gynhaliwyd tu allan i’r Orsaf Dân ar Coast Road, yn gwirio cerbydau ar gyfer eu haddasrwydd i’r ffordd, a gwirio bod golwg y gyrrwr yn cyrraedd y safon gofynnol.

Mae’n rhaid i yrwyr allu darllen rhif adnabod cerbyd sy’n gyfreithlon ac yn lân o bellter o 20 medr mewn amodau golau dydd.

Yn ffodus, o’r 79 gyrrwr gafodd eu stopio, mi basiodd pob un y profion golwg yn rhwydd, ac mi barhaodd y mwyafrif ar eu taith o fewn munud neu ddwy.

Fodd bynnag, er gwaethaf y canlyniadau da yma, cafodd sawl tocyn cosb eu rhoi i yrwyr am droseddau yn cynnwys:

• 13 x gyrru heb wisgo gwregys diogelwch
• 4 x gyrru tra’n defnyddio ffôn symudol
• 2 x dim MOT
• 1 x teiar diffygiol
• 4 x gyrru heb yswiriant
• 2 x troseddau platiau cerbyd
• 3 x llwythi peryglus
• 3 x stopio a chwilio
• 2 x Hysbysiad Gwaharddiad PG9, sy’n cyfyngu ar ddefnyddio cerbyd ar ffordd gyhoeddus oherwydd pryderon diogelwch

Cafodd gyrrwr ei arestio ar amheuaeth o yrru o dan ddylanwad cyffuriau ar ôl iddo roi prawf positif am ganabis. Mae o eisoes wedi’i ryddhau o dan ymchwiliad tra bod swyddogion yn disgwyl canlyniadau profion pellach.

Cafodd dau e- sgwter eu hatafaelu. Mae’r gyfraith yn caniatáu’r defnydd o e-sgwteri fel rhan o ymgyrch rhentu drwy gynllun awdurdodedig – sydd ddim ar gael yng Ngogledd Cymru, neu gallent cael eu defnyddio ar dir preifat hefo caniatâd perchennog y tir. Mae’n anghyfreithlon eu defnyddio ar ffyrdd cyhoeddus, palmentydd a llwybrau beicio.

Gellir darllen mwy o wybodaeth a chyngor yma: Cyngor ar ddefnyddio e-sgwter | Heddlu Gogledd Cymru

Meddai’r Rhingyll Duncan Logan o Uned Gwrthdrawiadau Difrifol Heddlu Gogledd Cymru: “Mae golwg da yn hanfodol ar gyfer gyrru’n ddiogel, a wnawn ni ddim ymddiheuro am geisio lleihau gwrthdrawiadau difrifol ac angheuol, yn unol â mentrau diogelwch y ffyrdd.

“Mae gan bawb gyfrifoldeb dros ddiogelwch ar y ffyrdd, ac rydym yn gweithredu’n erbyn y rhai sy’n gyfrifol am yrru anghyfreithlon bob dydd.

“Mi fydd ymgyrchoedd tebyg yn cael eu cynnal dros y misoedd nesaf fel rhan o’n hymrwymiad i wneud ffyrdd Gogledd Cymru mor ddiogel â phosib. Os ydi’r ymgyrch hon yn atal un unigolyn rhag cael anafiadau, neu’n waeth, cael eu lladd, yna ‘da ni’n ei  hystyried yn llwyddiant.”

Dylai unrhyw un sydd â pryderon am ddiogelwch y ffyrdd yn eu hardal nhw roi gwybod i Heddlu Gogledd Cymru drwy: Gysylltu â ni | Heddlu Gogledd Cymru