Dewis dyluniad disgybl ysgol gynradd fel logo ar gyfer Adnewyddu Bangor
Cynnwys y prif erthygl
Mae logo a gafodd ei ddylunio gan ddisgybl ysgol gynradd wedi cael ei ddewis er mwyn symboleiddio menter aml-asiantaeth Adnewyddu Bangor a gafodd ei lansio ym mis Mawrth.
Gofynnodd yr Arolygydd Ardal Ian Roberts i blant Ysgol Glancegin, ym Maesgeirchen, greu dyluniad logo a fyddai'n cynrychioli nodau Adnewyddu Bangor a pha mor falch ydyn nhw o fyw yn yr ardal.
Dewiswyd y dyluniad buddugol gan Georgia, sy'n ddisgybl blwyddyn 6, gan Ian Roberts, Arolygydd Ardal Gogledd Gwynedd. Bydd yn cael ei ddefnyddio rŵan gan yr heddlu a'i bartneriaid i gynrychioli'r gwaith parhaus yn y ddinas.
Mae'r fenter eisoes wedi gweld sawl arestiad mewn cysylltiad â throseddau gan gynnwys cyflenwi cyffuriau, ymddygiad treisgar, gwyngalchu arian a lladradau.
Mae gwaith pellach yn parhau er mwyn mynd i'r afael hefo problemau allweddol a nodwyd gan y gymuned leol a gwella delwedd y stryd fawr.
Dywedodd yr Arolygydd Ardal Ian Roberts: "Mae'r fenter hon er budd cymuned Bangor, a dyna pam roedden ni eisiau i'n trigolion ieuengaf gymryd rhan.
"Roedd y dyluniadau a gyflwynwyd gan y plant yn Ysgol Glancegin i gyd yn wych ac yn rhoi cynrychiolaeth wych o bopeth sydd gan Fangor i'w gynnig.
"Mae'n amlwg i mi eu bod nhw wrth eu bodd hefo lle maen nhw'n byw. Fedrai ddim aros gweld y dyluniad buddugol yn cael ei ddefnyddio ar draws y ddinas er mwyn hysbysebu'r gwaith partneriaeth parhaus."
