Dyn a wnaeth fygwth dynes gyda chyllell cyn dwyn a malu car wedi cael ei garcharu

Mae dyn a wnaeth fygwth dynes gyda chyllell cyn dwyn a malu car wedi cael ei garcharu.

Ymddangosodd Ryan Moore, 32 o New Hall Road, Rhiwabon yn Llys y Goron yr Wyddgrug (dydd Gwener, 26 Ionawr) lle cafodd ei ddedfrydu i ddwy flynedd a hanner o garchar yn dilyn digwyddiad ar ddydd Llun, 4 Medi 2023.

Mi wnaeth gyfaddef i wneud bygythiadau gydag arf peryglus, byrgleriaeth a lladrad, dwyn cerbyd mewn modd bygythiol, gyrru tra wedi ei wahardd, bod â chyffuriau Dosbarth B yn ei feddiant a bod ag arf peryglus yn ei feddiant mewn lle cyhoeddus ac achosi difrod troseddol. Cyfaddefodd Moore i beidio â stopio ar ôl gwrthdrawiad, methu â darparu sampl ar gyfer dadansoddiad a gyrru heb yswiriant.

Digwyddodd yr ymosodiad yn Southsea, Wrecsam, tua 12.30pm pan aeth cymydog i'r cyfeiriad gan weld Moore gyda chyllell.

Ar ôl mynd at Moore aeth yn fygythiol, gan chwifio'r gyllell. Gadawodd Moore y safle heb esgidiau a dwyn goriadau car o dŷ cyfagos, cyn mynd â'r car a'i yrru i mewn i'r gwrych ym Mrychdyn Newydd a dianc o'r safle. Cafodd ei arestio mewn gardd gyfagos, wedi meddwi ac yn cysgu. Yn ei feddiant roedd canabis a dwrn haearn.

Yn ychwanegol i'r ddedfryd, cafodd Moore ei ddiarddel rhag gyrru am 12 mis a derbyniodd  hefyd orchymyn atal yn erbyn y ddynes a fu'n ei bygwth.

Dywedodd y Swyddog Ymchwilio PC Lawes: "Dw i'n croesawu'r ddedfryd a roddwyd gan y llys heddiw yn dilyn y digwyddiad brawychus hwn a ddigwyddodd yn sgil meddwdod.

"Mi fuaswn i'n hoffi sicrhau'r cyhoedd ein bod ni'n canolbwyntio ar wneud ein cymunedau'n llefydd saffach drwy ymdrin yn gadarn hefo'r rhai hynny sy'n tueddu bod yn dreisgar a defnyddio arfau. 

"Hefyd, mae byrgleriaethau nid yn unig yn cael effaith andwyol ar unigolion ond hefyd ar y cymunedau lle mae'r troseddau hyn yn cael eu cyflawni. "Mae gwybod bod troseddwyr wedi bod yn eich cartref, lle dylech deimlo fwyaf diogel, ac wedi dwyn eiddo personol yn beth ofnadwy. 

Ni wnawn ni oddef yr ymddygiad ffiaidd hwn."