Deugain mlynedd o’r gwregys diogelwch

Bernir mai defnyddio gwregysau diogelwch mewn cerbydau yw’r datblygiad pwysicaf o bosibl o ran goroesi gwrthdrawiad ar y ffordd.

Mae’r mis hwn yn nodi pedwar degawd o wisgo gwregys diogelwch yn orfodol yn sedd flaen y car, a chafodd y ddeddfwriaeth ei hymestyn i bob teithiwr wyth mlynedd wedyn.

Wrth fyfyrio ar arwyddocâd defnyddio gwregys diogelwch, dywedodd Prif Arolygydd Caroline Mullen-Hurst o Heddlu Gogledd Cymru: “Gall gwisgo gwregys diogelwch olygu’r gwahaniaeth rhwng byw a marw. Yn anffodus mae’n broblem sydd dal yn amlwg ar ffyrdd Gogledd Cymru. Mae’n siomedig gweld fod pobl yn parhau i ddewis peryglu eu bywydau a bywydau pobl eraill.

“Gwregysau diogelwch yw un o’r nodweddion symlaf a phwysicaf ar gyfer gwarchod modurwyr a’u teithwyr. Mae’n hanfodol fod pawb yn gwisgo gwregys diogelwch, nid y gyrrwr yn unig. Mewn gwrthdrawiad, gall teithwyr sedd ôl heb wregys gael eu taflu ymlaen gyda digon o rym i ladd yr un yn y tu blaen.

“Gall gwrthdrawiadau ddigwydd ar unrhyw adeg. Felly mae’n hanfodol fod pawb yn gwisgo gwregys diogelwch ar bob taith, waeth pa mor fyr yw hi. Gallai tair eiliad fach i wisgo’r gwregys achub eich bywyd felly gwnewch yn siŵr eich bod yn gwisgo’ch un chi.”

Yn y DU, os yw gwregys diogelwch yn cael ei osod, mae’n ofyniad cyfreithiol i’w wisgo. Gall methu â gwneud arwain at ddirwy o £100 yn y fan a’r lle. Gall gynyddu i hyd at £500 os cewch eich dyfarnu’n euog yn y llys.

Nodiadau:

• Mae gan Heddlu Gogledd Cymru strategaeth gadarn ynghylch gorfodi troseddau’r ‘5 Angheuol’. Y rhain yw methu â gwisgo gwregys diogelwch, yfed a gyrru a gyrru ar gyffuriau, gyrru peryglus a diofal gan gynnwys cymryd risg yn ddiangen, goryrru a defnyddio ffôn symudol wrth yrru.
• Daeth y gyfraith sy’n gofyn i holl yrwyr wisgo eu gwregysau diogelwch i rym ar 31 Ionawr 1983.
• Rhwng Ionawr a Rhagfyr 2022 fe wnaeth swyddogion Heddlu Gogledd Cymru roi 611 o docynnau i yrwyr oherwydd nad oeddent yn gwisgo gwregys diogelwch.
• Yn 2021 cafodd 349 o docynnau cosb eu rhoi o gymharu a 426 yn 2020.
• Mae tystiolaeth fod pobl yn llai tebygol o ddefnyddio gwregysau diogelwch ar deithiau byr neu gyfarwydd. Mae hyn yn eu rhoi mewn perygl difrifol o anaf mewn gwrthdrawiad.