Gorchymyn gwasgaru mewn lle yn dilyn ymddygiad gwrthgymdeithasol yn Wrecsam

 

Bydd gorchymyn gwasgaru yn cael ei roi mewn lle yn ninas Wrecsam heddiw sef dydd Mercher 25 Ionawr oherwydd ymddygiad gwrthgymdeithasol diweddar.

Gwnaeth swyddogion dderbyn adroddiadau am lu o ddigwyddiadau gan grŵp rhwng 20 a 30 o ieuenctid a oedd yn crwydro rhwng lleoliadau yng nghanol y ddinas ar ddydd Llun, 23 Ionawr, rhwng 5pm a 10pm.

Roedd digwyddiadau'n cynnwys y grŵp yn ymosod, yn rhoi diffoddwr tân ymlaen, yn taflu arwyddion a cheiniogau at staff siopau ac yn rhedeg ar ôl plant iau.

Roedd hyn yn dilyn sawl adroddiad am ymddygiad gwrthgymdeithasol lefel isel yng nghanol y ddinas dros y penwythnos – yn enwedig Stryt y Rhaglaw, Dôl yr Eryrod a Stryt y Brenin. 

O ganlyniad, mae'r Arolygydd Luke Hughes wedi awdurdodi gorchymyn gwasgaru o 5pm heddiw (25 Ionawr) tan hanner nos, gan orchuddio'r ardal a amlinellir ar y map.

Mae'r gorchymyn yn rhoi'r grym i swyddogion a SCCH gyfeirio unrhyw un sy'n ymddwyn yn wrthgymdeithasol i adael yr ardal a pheidio dychwelyd o dan Adran 34 Deddf Troseddau Ymddygiad Gwrthgymdeithasol a Phlismona 2014.

Bydd methu â chydymffurfio â'r gorchymyn gwasgaru yn arwain at arestiad.

Dywedodd yr Arolygydd Hughes: "Rwyf am sicrhau pobl Wrecsam ein bod yn cymryd y mater hwn o ddifrif. Mae ymddygiad gwrthgymdeithasol yn ein dinas yn annerbyniol ac ni fydd yn cael ei oddef.

"Rwyf yn benderfynol na ddylai ymddygiad y lleiafrif dynnu sylw oddi wrth yr ymdeimlad cadarnhaol yn Wrecsam bellach.

“Mae Wrecsam yn ffynnu. Mae ymddygiad anghymdeithasol ar i lawr yn sylweddol, a bydd y rhai hynny sy'n achosi'r problemau hyn yn cael eu cosbi yn llym.

"Rwyf yn annog rhieni i sicrhau eich bod yn gwybod lle mae eich plant a'r hyn maent yn ei wneud."