Dedfrydu Gang Troseddau Cyfundrefnol sy'n ymwneud â chynllwynio i gyflenwi cyffuriau

Mae ymgyrch lwyddiannus gan Heddlu Gogledd Cymru wedi tarfu ar gang troseddol a wnaeth gynllwynio i ddod â mwy na £2 miliwn o gyffuriau i'r rhanbarth.

Yn Llys y Goron Caernarfon (20 Rhagfyr), carcharwyd 14 o unigolion o Ogledd Cymru a Glannau Mersi am gyfanswm o 72 mlynedd ac wyth mis am gynllwynio i gyfenwi cocên a chanabis.

Amlygodd adroddiadau cudd-wybodaeth fod rhai o'r llwythi cyffuriau hyn wedi'u casglu a'u cyfnewid mewn lleoliadau yng Ngwynedd.

Cafodd symudiadau a negeseuon y rhai hynny a amheuir o fod ynghlwm eu monitro'n agos gan Uned Troseddau Difrifol a Threfnedig Heddlu Gogledd Cymru fel rhan o Ymgyrch Blue Glacier.

Roedd yr ymchwiliad hwn hefyd yn cynnwys data telathrebu Ymgyrch Venetic a rannwyd gyda Heddlu Gogledd Cymru gan Asiantaeth Troseddu Cenedlaethol. 

Cafwyd y data telathrebu yn gudd gan weinyddwyr o ran ffonau symudol amgryptedig (EncroChat). Darparwyd data perthnasol i Ymgyrch Blue Glacier yna i Heddlu Gogledd Cymru i'w symud ymlaen. 

Gwnaeth dadansoddi negeseuon amgryptedig a ddefnyddiwyd gan aelodau'r gang arwain at arestiadau arwyddocaol ac atafaelu cyffuriau yn y pen draw.

Yn gronnol, atafaelwyd 10kg o gocên a meintiau cyfanwerthol o ganabis o ganlyniad i'r camau plismona hyn rhwng misoedd Mai a Thachwedd 2020.

Casglwyd cyfanswm mawr o arian parod sef £467,235 oddi wrth y rhai o dan amheuaeth, ynghyd ac arian crypto a oedd werth dros £26,000.

Dangosir delweddau sy'n dangos meintiau'r cyffuriau a'r arian a atafaelwyd isod.

Yn ystod yr achos llys, canmolodd y Barnwr Nicola Saffman waith swyddogion Heddlu Gogledd Cymru am eu gwaith ymchwil o fewn yr achos.

Gan adlewyrchu ar y dedfrydau a roddwyd, dywedodd y Ditectif Arolygydd Dean Jones:  "Mae'r dedfrydau heddiw'n anfon neges glir na wnawn oddef gwerthu cyffuriau yn ein cymunedau. 

"Rydym wedi ymroi i weithio, ynghyd ag asiantaethau eraill, i gadw un cam ar y blaen i'r troseddwyr hyn. Fe wnawn ymlid unrhyw un sy'n torri'r gyfraith ac sy'n camfanteisio ar bobl er eu budd eu hunain yn ddidrugaredd. 

"Nid yn unig mae'r canlyniad hwn yn dystiolaeth o waith caled ac ymroddiad y swyddogion, ond hefyd y cymorth rydym yn eu derbyn gan y cyhoedd sy'n cynorthwyo'n fawr wrth ymdrin â'r drosedd hon sydd yn cael cymaint o effaith niweidiol ar fywydau pobl.

"Mae'r ymgyrch hon ond yn rhan o'r ymchwiliad parhaus sy'n cael ei wneud. Dylai fod yn rhybudd o'r canlyniadau i unrhyw un sydd ynghlwm â throsedd o'r fath.

"Gwnawn barhau i geisio gwneud Gogledd Cymru'r lle mwyaf diogel i fyw ynddo yn y DU."

Am gynllwynio i gyflenwi cocên a chynllwynio i gyflenwi canabis, rhoddodd y barnwr y dedfrydau canlynol. Bydd yr ail ddedfrydau yn rhedeg ar y cyd â'r cyntaf:

• Kenneth William Hillier, 38, o Hollins Close, Wavertree, Lerpwl: 12 mlynedd, naw mis o garchar, a chwe mlynedd a thri mis yn y drefn honno.
• Luke Evans, 28, o Waunfawr, Gwynedd: 11 mlynedd, tri mis, a chwe mlynedd a hanner yn y drefn honno. Ynghyd â dwy flynedd am gynllwynio i gyflenwi MDMA.
• Lee James Dever, 47, o Penman Crescent, Halewood, Glannau Mersi: Naw mlynedd, a phum mlynedd a naw mis.
• Michael Robert Currey, 47, o Haslington Grove, Halewood, Glannau Mersi: Chwe mlynedd a naw mis
• Nathan Roberts, 26, o Lys Mathieson, Bangor, Gwynedd: Dwy flynedd wedi'i gohirio am ddwy flynedd.
• Luke David Smith, 30, o Lawr y Nant, Bethesda, Gwynedd: Dwy flynedd wedi'i gohirio am ddwy flynedd.
• Jamie Roberts, 28, o Heol y Dwr, Penygroes, Gwynedd: Dwy flynedd wedi'i gohirio am ddwy flynedd.
• Ian Cogley, 38: Chwe mlynedd ac wyth mis, ac 16 mis.
• Joshua Michael Royds, 26, o Fryn Teg, Biwmares: Chwe blynedd ac wyth mis, pedair blynedd.
• Molly Jane Bailey, 24, o Grove Road, Bae Colwyn: Pum mlynedd a chwe mis, pedair blynedd a mis.
• James Ryan Morgan, 21, o Ffordd Maes Barcer, Caernarfon: Chwe blynedd am gynllwynio i gyflenwi cocên yn unig.
• Rebecca Louise Williams, 25, o Grove Park, Bae Colwyn: Chwe blynedd, pedair blynedd a chwe mis.
• Gwnaeth Ian James Hughes, 49, a Claire Michelle Hughes, 46, ill dau o Stad Cae Gwigin, Tal y bont, Bangor, gyfaddef i gynllwynio cyflenwi canabis yn unig. Gwnaeth y ddau dderbyn dedfrydau wedi'u gohirio am un flwyddyn ac wyth mis ac am ddwy flynedd.