Ymgyrch Bang
Mae Nos Galan Gaeaf a Noson Tân Gwyllt yn ddigwyddiadau cyffrous i lawer o bobl ledled Gogledd Cymru. Drwy Ymgyrch Bang, mae Heddlu Gogledd Cymru a phartneriaid yn cydweithio pob blwyddyn er mwyn helpu pawb fwynhau’r dathliadau’n ddiogel, yn gyfrifol ac efo parch tuag at bobl eraill.
Gan weithio ynghyd â’r awdurdodau lleol a phartneriaid cymunedol, ‘da ni’n rhannu cyngor, hyrwyddo gweithgareddau lleol ac ymdrin ag ymddygiad gwrthgymdeithasol er mwyn helpu cadw’n cymunedau ni’n ddiogel.
Er bod y mwyafrif o bobl yn dathlu’n gyfrifol, mi all digwyddiadau ymddygiad gwrthgymdeithasol gynyddu yn ystod y cyfnod hwn. Mae’r hyn all ymddangos fel hwyl diniwed achosi gofid, difrodi eiddo, rhoi pwysau ar y gwasanaethau brys ac, mewn rhai achosion, arwain at droseddau.
Efo’n gilydd, mi allwn ni sicrhau bod Nos Galan Gaeaf a Noson Tân Gwyllt yn parhau bod yn hwyl ar gyfer pawb.
Beth ydy Ymgyrch Bang?
Ymgyrch Bang ydy ymgyrch blynyddol Nos Galan Gaeaf a Noson Tân Gwyllt Heddlu Gogledd Cymru.
Mae’r ymgyrch efo’r nod o:
- Hyrwyddo dathliadau diogel a chyfrifol.
- Lleihau ymddygiad gwrthgymdeithasol a difrod troseddol.
- Helpu pobl ifanc drwy weithgareddau cymunedol cadarnhaol.
- Helpu preswylwyr deimlo’n ddiogel a’u parchu yn eu cymunedau.
- Annog pobl ifanc i gysylltu â’r sefydliad cywir pan maen nhw angen help neu gyngor.
Fel rhan o Ymgyrch Bang, mae timau plismona cymdogaethau yn ymweld ag ysgolion, grwpiau ieuenctid a lleoliadau cymunedol er mwyn siarad efo pobl ifanc ynglŷn â chadw’n ddiogel a gwneud dewisiadau cadarnhaol.
Mae arian gan Ymddiriedolaeth yr Heddlu a’r Gymuned (PACT) hefyd yn cefnogi gweithgareddau a mentrau lleol, er mwyn diddori pobl ifanc yn ystod dathliadau’r hydref.
Mi ddylai Nos Galan Gaeaf a Noson Tân Gwyllt fod yn hwyl i bawb.
Cofiwch:
- Ewch i ddigwyddiadau wedi ei drefnu lle bo’n bosib.
- Edrychwch ar ôl eich ffrindiau chi.
- Parchwch gartrefi, gerddi ac eiddo pobl.
- Dilynwch gyngor diogelwch ynghylch tân gwyllt a choelcerthi.
- Byddwch yn ystyriol o gymdogion mewn oed, plant ifanc ac anifeiliaid anwes.
Peidiwch â:
- Thaflu wyau, blawd na thân gwyllt tuag at bobl, cerbydau nac eiddo.
- Difrodi neu fandaleiddio eiddo.
- Tresmasu neu fynd ar dir preifat heb ganiatâd.
- Defnyddio Nos Galan Gaeaf neu Noson Tân Gwyllt fel esgus i fygwth, aflonyddu neu ddychryn pobl eraill.
- Ymwneud ag ymddygiad all eich rhoi chi neu bobl eraill mewn perygl.
Cofiwch: mi all gweithrediadau sy’n ymddangos fel jôc achosi niwed go iawn, ac mi all arwain at weithredu gan yr heddlu.
Mae rhieni a gofalwyr yn chwarae rhan bwysig wrth helpu pobl ifanc ddathlu’n ddiogel. Cymerwch amser er mwyn:
- Siarad efo’ch plant chi ynglŷn ag ymddygiad cyfrifol.
- Trafod y canlyniadau posib o ymddygiad gwrthgymdeithasol a difrod troseddol.
- Gwybod lle mae eich plant chi ac efo pwy maen nhw.
- Eu hannog nhw i fynd i ddigwyddiadau cymunedol trefnedig.
- Sicrhau bod pobl ifanc yn deall sut i gadw’n ddiogel o gwmpas tân gwyllt a choelcerthi.
- Atgoffa plant i barchu preswylwyr sy’n dewis peidio cymryd rhan mewn gweithgareddau Nos Galan Gaeaf.
Mi all sgwrs syml helpu atal digwyddiadau a chadw pawb yn ddiogel.
‘Da ni’n gofyn i fân-werthwyr gefnogi Ymgyrch Bang drwy helpu lleihau cyfleoedd i ymddwyn yn wrthgymdeithasol.
Ystyriwch:
- Gwrthod gwerthu wyau a blawd i blant sydd ddim yng nghwmni oedolyn.
- Cadw’n wyliadwrus o ran ymddygiad prynu amheus.
- Adrodd pryderon lle bo’n briodol.
- Cefnogi ymdrechion cymunedol ehangach er mwyn sicrhau cyfnod Nos Galan Gaeaf diogel.
Mi all cydweithio efo busnesau lleol helpu lleihau ymddygiad niwsans a gwarchod cymunedau.
Pwy wnewch chi ffonio?
Cysylltwch efo’r Gwasanaeth Cywir
Mae’r gwasanaethau brys ac asiantaethau partner yn profi mwy o alw o gwmpas Nos Galan Gaeaf a Noson Tân Gwyllt. Helpwch ni gadw gwasanaethau ar gael ar gyfer y bobl sydd eu hangen fwyaf, drwy gysylltu â’r sefydliad cywir.
Ar faterion yn ymwneud ag:
- Ymddygiad gwrthgymdeithasol.
- Pryderon diogelwch cyhoeddus.
- Difrod troseddol.
- Gweithgarwch amheus.
- Materion plismona nad ydyn nhw’n rhai brys.
Er mwyn riportio materion nad ydyn nhw’n rhai brys – ewch ar:
Er mwyn cael arweiniad pellach ynglŷn â sut a phryd i gysylltu efo ni, cliciwch yma:
Argyfwng: Ffoniwch 999 os oes bygythiad uniongyrchol i fywyd, difrod difrifol, trosedd ar y gweill neu sefyllfa argyfyngol.
- Pryderon yn ymwneud â gwerthu tân gwyllt.
- Cwynion am sŵn gormodol.
- Taflu sbwriel.
- Tipio anghyfreithlon.
- Unrhyw broblemau amgylcheddol neu gymunedol eraill.
Dewch o hyd i wybodaeth eich awdurdod lleol drwy dudalen ein partneriaid ni:
Cymerwch ran
Mae Her Ymgyrch Bang yn rhoi cyfle i blant a phobl ifanc ledled Gogledd Cymru i wneud gwahaniaeth cadarnhaol yn eu cymunedau nhw, wrth hefyd gael cyfle i ennill gwobrau arian parod ar gyfer eu hysgol, clwb neu grŵp
Cliciwch yma er mwyn cael rhagor o wybodaeth ynglŷn â Her Ymgyrch Bang:
Posteri a Gweithgareddau Argraffadwy
Posteri “Dim Cast neu Geiniog, Diolch”
‘Da ni wedi cynhyrchu posteri y gellir eu lawrlwytho ar gyfer preswylwyr sy’n well ganddynt beidio â derbyn galwyr Cast neu Geiniog.
Mi allwch chi:
- Eu lawrlwytho a’u hargraffu adref.
- Eu rhannu nhw efo aelodau’r teulu, cymdogion hŷn neu breswylwyr bregus.
- Eu dangos nhw mewn ffenestri neu ar ddrysau yn ystod Nos Galan Gaeaf.
‘Da ni’n gofyn i bawb sy’n cymryd rhan mewn gweithgareddau Nos Galan Gaeaf i barchu cartrefi sy’n dangos y posteri hyn.
Rhagor o Wybodaeth
Er mwyn cael rhagor o wybodaeth ynglŷn ag Ymddiriedolaeth yr Heddlu a’r Gymuned (PACT), a’r gweithgareddau mae’n eu hyrwyddo, ewch ar:
Mi allwch chi hefyd gael y newyddion diweddaraf ynglŷn â gweithgarwch eich tîm plismona lleol chi drwy gydol Nos Galan Gaeaf a Noson Tân Gwyllt drwy ddilyn: #YmBang26
