Beth yw priodas dan orfod?
Yn yr adran hon:
| 1. Beth yw priodas dan orfod? |
| 2. Sut i riportio priodas dan orfod |
| 3. Sefydliadau cymorth priodas dan orfod |
Priodas dan orfod yw pan nad yw un neu'r ddau o’r bobl yn cydsynio (cytuno) i'r briodas, neu pan na allan nhw gydsynio.
Gall priodas dan orfod ddigwydd i unrhyw un o unrhyw gefndir a chenedligrwydd, a gall effeithio ar wrywod a menywod. Nid dim ond i bobl ifanc mae'n digwydd: gall ddigwydd i oedolion hefyd.
Mae'n wahanol i briodas wedi'i threfnu lle mae yna ddewis a lle mae’r ddau berson yn cytuno iddi.
Mae priodas dan orfod yn aml yn gysylltiedig â chamdriniaeth ar sail anrhydedd, er nad yw hyn yn wir bob amser.
Priodas dan orfod a'r gyfraith
Yn y Deyrnas Unedig mae'n anghyfreithlon gorfodi rhywun i briodi. Mae hyn yn cynnwys:
- mynd â rhywun dros y môr i'w gorfodi i briodi (hyd yn oed os na fydd y briodas dan orfod yn digwydd)
- priodi rhywun nad yw’n gallu cydsynio i'r briodas
Mae gennych chi hawl i ddewis pwy rydych chi'n priodi â nhw, pryd byddwch chi'n priodi neu a ydych chi eisiau priodi neu beidio.
Cael eich gorfodi i briodi
Mae'n bosibl bod eich rhieni neu'ch teulu yn eich gorfodi i briodi am eu bod nhw’n meddwl mai dyma'r peth gorau ichi. Neu efallai y bydd rhai teuluoedd yn gweld priodas dan orfod fel rhan o'u crefydd neu eu diwylliant.
Efallai eu bod yn rhoi pwysau arnoch chi yn y ffyrdd canlynol:
- camdriniaeth gorfforol: bygythiadau, trais corfforol a rhywiol
- camdriniaeth emosiynol a seicolegol: gwneud ichi deimlo fel petaech chi’n dwyn gwarth ar eich teulu
- camdriniaeth ariannol: mynd â’ch cyflog neu atal arian
Os ydych chi eisoes wedi cael eich gorfodi i briodi, efallai y bydd y gamdriniaeth hon yn dal i ddigwydd.
Arwyddion rhybuddio priodas dan orfod
Gallai priodas dan orfod fod yn digwydd i rywun rydych chi'n eu hadnabod.
Arwyddion y gallai rhywun ddioddef priodas dan orfod cyn hir (neu eu bod wedi’i dioddef eisoes):
- rhedeg i ffwrdd o’u cartref
- hunan-niweidio neu geisio eu lladd eu hunain
- iselder, neu fynd yn bryderus neu dynnu'n ôl
- perfformiad gwael yn y gwaith, yr ysgol neu'r coleg neu absenoldeb heb esboniad
- dyweddïo’n annisgwyl â dieithryn nad ydych wedi clywed amdanyn nhw o'r blaen
- gwyliau sydyn (mae rhai pobl yn cael eu twyllo i fynd dros y môr ar wyliau neu i weld perthnasau)
- dim rheolaeth dros eu harian eu hunain
- peidio â dychwelyd ar ôl ymweliad â gwlad arall