Pobl ar goll mewn gwlad dramor
Pan fydd rhywun yn mynd ar goll mewn gwlad dramor, yr heddlu lleol yn y wlad y mae’r unigolyn ar goll ynddi sy’n gyfrifol am ymchwilio. Mae ymateb yr heddlu lleol yn amrywio’n fawr o un wlad i’r llall.
Weithiau gall heddlu’r Deyrnas Unedig gamu i mewn pan fydd dinasyddion neu drigolion y DU yn mynd ar goll dramor. Mae sut y dylech gysylltu â ni yn dibynnu ar a ydych chi yn y DU neu a ydych chi dramor.
Dylech riportio wrth heddlu’r DU fod y person ar goll. Os ydych chi’n poeni ei fod mewn perygl uniongyrchol, ffoniwch 999. Os oes gennych nam ar eich clyw neu’ch lleferydd, defnyddiwch eich gwasanaeth ffôn testun 18000 neu anfonwch neges destun atom ar 999 os ydych chi wedi cofrestru ymlaen llaw gyda'r gwasanaeth SMSbrys.
Fel arall, gallwch ffonio 101 neu mae rhai heddluoedd yn eich galluogi i riportio person ar goll ar-lein.
Pan fo person ar goll mewn gwlad dramor, fel arfer yr heddlu lle mae’r person fel arfer yn byw sy’n gyfrifol am yr achos.
Os nad yw’r person sydd ar goll yn byw yn y DU, gall yr heddlu lleol i’r teulu gymryd cyfrifoldeb dros yr achos. Os ydych yn ffonio 999 neu 101, byddwch yn cael eich cyfeirio at eich heddlu lleol a fydd yn gallu nodi’r manylion a’u trosglwyddo i’r heddlu lleol cywir.
Gallwch hefyd- Riportiwch wrth yr heddlu yn y wlad lle’r aeth y person ar goll.
- Riportiwch wrth yr heddlu yn y DU sy’n gwasanaethu’r ardal lle mae’r person fel arfer yn byw - ar-lein os yn bosib neu drwy eu ffonio.
Os nad yw’r person sydd ar goll yn byw yn y DU, gallwch riportio ei fod ar goll wrth yr heddlu lleol lle mae ei deulu.
Riportio bod person ar goll ar-lein
Rhestr o fanylion cyswllt heddluoedd y DU
Allwch chi ddim ffonio 999 neu 101 o’r tu allan i’r DU.
Y Swyddfa Dramor, y Gymanwlad a Datblygu
Yn ogystal â chysylltu â’r heddlu, dylech hefyd gysylltu â’r Swyddfa Dramor, y Gymanwlad a Datblygu (FCDO) ar +44 (0)207 008 1500.
Gofynnwch am gymorth conswl ar gyfer y wlad y mae’r unigolyn ar goll ynddi.
Beth sy’n digwydd pan fyddwch chi’n riportio bod rhywun ar goll dramor
Yr heddlu lleol yn y wlad y mae’r person ar goll ynddi sy’n gyfrifol am yr ymchwiliad a’r trefniadau chwilio.
Bydd heddlu’r DU yn cysylltu â’r heddlu lleol drwy’r system SIRENE Ewropeaidd neu drwy Interpol (Sefydliad Rhyngwladol Heddluoedd Troseddol).
Cyngor a chymorth
Mae LBT Global (Ymddiriedolaeth Lucie Blackman gynt) yn elusen sy’n cefnogi pobl sy’n chwilio am rywun sydd ar goll dramor.
Gallant eich helpu i:
- dod o hyd i rywun i siarad ag ef am gymorth, megis teuluoedd sydd wedi wynebu profiad tebyg
- mynd i’r wlad lle mae’r person ar goll, chwilio amdano neu weithio gyda’r heddlu lleol
- delio â'r heddlu tramor
- gweithio gyda heddlu’r DU; Y Swyddfa Dramor, y Gymanwlad a Datblygu; Interpol; neu awdurdodau eraill
- creu ymgyrch gyhoeddusrwydd
Os ydych chi yn y DU, gall yr elusen Missing People roi cymorth emosiynol i chi hefyd.
Efallai y bydd eich AS lleol hefyd yn gallu helpu i ddelio ag awdurdodau lleol.