Cyngor i ofalwyr pobl â dementia sydd mewn perygl o fynd ar goll
Dyma rai pethau y gallwch eu gwneud i helpu i atal pobl â dementia rhag mynd ar goll, a helpu i ddod o hyd iddyn nhw os gwnân nhw.
Llenwi ffurflen Protocol Herbert
Gall teulu neu ffrindiau rhywun sy'n agored i niwed, neu'r person ei hun, lenwi ffurflen Protocol Herbert. Mae'n cynnwys gwybodaeth i helpu'r heddlu os byddan nhw’n mynd ar goll.
Deall pam maen nhw am fynd allan
Os gallwch chi ganfod pam mae'r unigolyn yn awyddus i fynd allan, efallai y byddwch yn gallu ateb ei anghenion mewn ffyrdd eraill.
Er enghraifft, efallai fod yr unigolyn wedi syrffedu, neu'n meddwl bod rhaid mynd allan i'r gwaith neu i godi plant o'r ysgol.
Cyngor Cymdeithas Alzheimer ar gerdded o gwmpas
Technoleg y cartref a thechnoleg bersonol
Fe allech chi ystyried defnyddio:
- synwyryddion drws:
- sy’n rhybuddio ffrindiau neu’r teulu os oes drws allanol wedi agor, neu
- sy’n chwarae neges wedi’i recordio i ddweud wrth yr unigolyn am alw rhywun yn lle gadael eu cartref
- larwm ffiniau sy’n rhybuddio ffrindiau neu’r teulu os bydd yr unigolyn yn gadael man penodol
- dyfais tracio mewn wats, ar gylch allweddi neu o gwmpas y gwddf sy’n gadael i ffrindiau, teulu neu’r heddlu wybod ble mae’r unigolyn
- larwm i’w wisgo, i’r unigolyn ei ddefnyddio os yw’n sylweddoli ei fod ar goll
Ffonau symudol
Os oes gan yr unigolyn ffôn symudol fe allwch chi:
- ychwanegu gwybodaeth argyfwng at y ffôn i rywun sy’n dod o hyd iddyn nhw ei gweld o’r sgrin gloi (iPhone Apple, ffonau Android)
- gosod y tracio i ganiatáu i’r teulu, ffrindiau a’r heddlu weld ble mae’r unigolyn (iPhone Apple, ffonau Android)
Dylai’r technolegau hyn gael eu defnyddio i helpu rhywun i gadw'n ddiogel, gan barchu eu preifatrwydd yr un pryd.
Cyngor Cymdeithas Alzheimer ar sut gall technoleg helpu gyda dementia
Cario gwybodaeth gysylltu
P'un a oes gan yr unigolyn ffôn symudol ai peidio, fe allai gario rhywfaint o wybodaeth sylfaenol yn ei waled, fel pwy i gysylltu â nhw os aiff ar goll a bod rhywun yn dod o hyd iddo.