Trawsfynydd

Ymddygiad Gwrthgymdeithasol

‘Da ni wedi cyflwyno 16 Cerdyn Melyn am Ymddygiad Gwrthgymdeithasol ar draws ein ardal ni, i bobl ifanc yn achosi niwsans ac oedolion yn achosi problemau cymdogol. ‘Da ni wedi cynnal patrolau ar y cyd efo amryw o asiantaethau partner, fel Cartrefu a swyddogion gorfodaeth Strydoedd Gwynedd, yn ein parthau stopio troseddau newydd ym Mlaenau Ffestiniog. Mae dau oedolyn wedi derbyn Hysbysiadau Gwarchod y Gymuned Llawn am gamfanteisio’n barhaus ar oedolyn bregus yn ardal Blaenau Ffestiniog. Mae dau oedolyn wedi derbyn Hysbysiadau Rhybudd Gwarchod y Gymuned am gamfanteisio ar ddynes fregus yn ardal y Bermo. O ganlyniad, ‘da ni heb gael adroddiadau pellach o ymddygiad gwrthgymdeithasol yn y lleoliad, sydd wedi ail-sefydlu ymddiriedaeth a hyder yn y gymuned. ‘Da ni hefyd wedi cynnal patrolau penodol yn ardaloedd Bala a Dolgellau, ar ôl derbyn adroddiadau bod pobl ifanc yn aflonyddu unigolion hŷn yn y gymuned. O ganlyniad, mae sawl atgyfeiriad wedi’i gyflwyno i’n partneriaid ni yn y tîm cyfiawnder ieuenctid er mwyn gweithio efo’r bobl ifanc hyn. Yn ddiweddar, mae dyn hysbys o ardal Blaenau Ffestiniog wedi cael dedfryd 46 wythnos yn y carchar am droseddau cam-drin domestig. Mi roedd hefyd yn achosi ymddygiad gwrthgymdeithasol yn y dref yn rheolaidd. ‘Da ni wedi gweithio efo perchennog eiddo masnachol ar Stryd Fawr Blaenau, er mwyn diogelu eu heiddo sydd wedi atal ymddygiad gwrthgymdeithasol yn y lleoliad. Mae digwyddiadau cerddoriaeth mawr wedi’u cynnal yn ardaloedd Bala a’r Bermo yn ystod mis Mai. Mi wnaeth ein tîm ymdrin â nifer o ddigwyddiadau ymddygiad gwrthgymdeithasol a chymryd llawer iawn o alcohol oddi wrth bobl o dan oed. Mi helpodd hyn sicrhau bod digwyddiadau’n rhedeg yn esmwyth, a sicrhau bod pawb a ddaeth yn mwynhau eu hunain. Mae holiaduron ymddygiad gwrthgymdeithasol wedi’u dosbarthu yn ardaloedd Penrhyndeudraeth a Thremadog, efo’r nod o ddeall y problemau ymddygiad gwrthgymdeithasol sy’n effeithio ar y gymunedau er mwyn ceisio eu datrys. Mi gyflawnwyd gweithio partneriaeth pellach yn ardaloedd Porthmadog efo Grŵp Cynefin, wrth iddyn nhw gynnal eu Sioe Deithiol Troseddau Casineb. Mi roedd gwaith ar y cyd pellach yn cynnwys cyflawni ymweliadau i ardaloedd eraill Porthmadog efo Grŵp Cynefin. ‘Da ni wedi cynnal patrolau penodol yng Nghricieth oherwydd pryderon ynglŷn ag ymddygiad gwrthgymdeithasol ieuenctid yno. Mae nifer o unigolion wedi cael gwŷs i’r llys oherwydd torri amodau Gorchymyn Gwarchod Mannau Cyhoeddus ym Mhwllheli. Mi gyflawnwyd ymweliad ar y cyd efo’r adran dai yn ardal Cesail y Bryn, Pwllheli oherwydd pryderon ymddygiad gwrthgymdeithasol parhaus. Mi gyflawnwyd gwaith ar y cyd efo’r Adran Dai yn Harlech a Phrenteg, er mwyn ymdrin â phryderon ymddygiad gwrthgymdeithasol parhaus yn yr ardaloedd hyn.

Cyffuriau

‘Da ni wedi cynnal gwarant ar y cyd efo Safonau Masnach mewn eiddo busnes ym Mlaenau Ffestiniog. Mi atafaelwyd dybaco ffug a ‘da ni’n ymchwilio i droseddau sy’n ymwneud â chynnyrch ffug, gwyngalchu arian, a thwyll. O ganlyniad, ‘da ni hefyd wedi cael cudd-wybodaeth gwerthfawr er mwyn ymdrin â chyflenwi cyffuriau yn yr ardal. Mi gynhaliom ni ddiwrnod gweithredu yn y coleg lleol ym Mhwllheli a Dolgellau, gan weithio mewn partneriaeth â thîm lles y coleg ar ôl pryderon ynglŷn â chymryd cyffuriau ar eu safleoedd. Mi ddefnyddiwyd gi cyffuriau, ac mi roedd yn gadarnhaol nodi na ddaeth y ci o hyd i gyffuriau ar unrhyw un ar y ddau safle. ‘Da ni wedi cael nifer o ddyddiau gweithredu gyda swyddogion Cymdogaethau, yn chwilio am unigolion penodol yn ardaloedd y Bermo a Blaenau. Mi roedd hyn yn ymwneud â nifer o bobl yn cael eu stopio a’u chwilio. O ganlyniad i’r gweithgarwch rhagweithiol hyn, mae nifer o unigolion yn yr ardal wedi’u rhyddhau o dan ymchwiliad ar hyn o bryd am droseddau cyflenwi cyffuriau, yn ogystal â nifer o unigolion yn cael eu herlyn am droseddau meddu ar gyffuriau. Mae gwaith ar y gweill o fewn ein timau ni ac asiantaethau eraill er mwyn datblygu ein cudd-wybodaeth a gwybodaeth ynglŷn â chyffuriau yn ein cymunedau ni. ‘Da ni hefyd wedi cyflawni gwaith da ar y cyd efo’n partneriaid ni, gan ddiogelu dau unigolyn bregus, a amheuir eu bod yn cael eu camfanteisio gan werthwyr cyffuriau yn y Bermo a Blaenau Ffestiniog. Mae’r unigolion bregus hyn erbyn hyn wedi’u diogelu ac yn cael help gan yr asiantaethau perthnasol. ‘Da ni hefyd wedi cyflawni nifer o atafaeliadau cyffuriau o ganlyniad stopio a chwilio cadarnhaol yn ardal y Bermo, lle derbyniodd y troseddwyr ddatrysiadau cymunedol. Mae gwaith wedi parhau o ran datblygu cudd-wybodaeth yn ardaloedd Porthmadog a Phwllheli, ac mi gynhaliwyd gwarant cadarnhaol yn ardal Morfa Nefyn. Mae nifer uwch o gofnodion cudd-wybodaeth wedi cael eu cyflwyno. Mae’r tîm plismona cymdogaethau wedi cynnal nifer o stopiau gyrru ar gyffuriau a stopio a chwilio ac mi ganfuwyd nifer yn meddu ar ganabis o ganlyniad. Mi ymwelwyd â chyfeiriad gyda’r tîm cartrefu a’r uned gŵn oherwydd pryderon ynglŷn â chogio yn ardal Porthmadog. Mi gynhaliwyd batrôl yn ardal Maes Deudraeth efo Grŵp Cynefin a Chlwyd Alun er mwyn deall pryderon cymunedol. Mae gwaith partneriaeth yn parhau yn y maes hwn.

Goryrru

Mi gynhaliwyd ymgyrch ar y cyd efo’r Uned Troseddau Ffyrdd yn ardal Dolgellau a Thanygrisiau, lle roesom 20 Adroddiad Trosedd Traffig am oryrru, 10 rhybudd llafar am oryrru, a 4 Adroddiad Trosedd Traffig am beidio â gwisgo gwregys. Mi arestiwyd ddyn am Adran 5A gyrru ar gyffuriau a meddu ar ganabis. Mae SCCH wedi cynnal ymarferion gorfodi goryrru o fewn y terfynau cyflymder 20mya ar draws yr ardal, gan gynnwys ardaloedd Harlech, Llanbedr, y Bermo, Tywyn a Bala. Mi roedd yn gadarnhaol gweld lefel uchel o gydymffurfiaeth yn yr ardaloedd hyn i gyd. Mae’r tîm GanBwyll wedi bod i safleoedd penodol lle ‘da ni wedi derbyn cwynion ynglŷn â nhw, ac wedi cael adborth cadarnhaol gan ein cymunedau ni. Mae gwiriadau cyflymder hefyd wedi’u cynnal wrth Ysgol Tan y Castell, Harlech oherwydd pryderon goryrru y tu allan i’r ysgol. Mi ddosbarthwyd holiaduron oherwydd pryderon ynglŷn â goryrru yn Harlech. Mi gynhaliwyd gwiriadau cyflymder pellach ym Mhorth y Gest, ar ôl i gynghorydd lleol ym Morfa Bychan roi gwybod i ni bod aelodau’r gymuned wedi codi pryderon ynglŷn â goryrru drwy’r pentref. Mi godwyd pryderon yng Nghricieth y tu allan i Ysgol Treferthyr ynglŷn â goryrru yn y parth 20mya, yn enwedig yn ystod amser cau’r ysgol. Mae cynlluniau ar waith ar gyfer ymgyrch ar y cyd yn yr ardal efo’r Uned Troseddau Ffyrdd, er mwyn gorfodi troseddau goryrru. Mae hysbysiadau Adran 59 wedi’u cyhoeddi gan y tîm Plismona Cymdogaethau oherwydd gyrru gwrthgymdeithasol ym Morfa Bychan. Mae patrolau’n cael eu cynnal yn reolaidd yma. Mae cynllun POP ar y gweill er mwyn ceisio lleihau’r problemau ‘da ni’n eu profi yma. Mae’r ardal wedi prynu laser cyflymder tystiolaethol, er mwyn i’r Tîm Plismona Cymdogaethau gael hyfforddiant i’w ddefnyddio ac yna’n gallu cyflwyno tocynnau am oryrru.