Efenechtyd

Ymddygiad Gwrthgymdeithasol a Gweithgarwch Troseddol

Mae swyddogion Patrôl a Chymdogaethau Cefn Gwlad Conwy a Sir Ddinbych wedi ymrwymo i ymdrin ag ymddygiad gwrthgymdeithasol drwy fynd i’r afael â’r achosion sylfaenol. Defnyddiwyd gorchmynion cau mewn dau eiddo yn Ninbych, lle profwyd lefelau uchel o anrhefn. Mae’r camau hyn yn helpu diogelu aelodau bregus o'r gymuned ac yn dangos na fydd ymddygiad troseddol yn cael ei oddef. Bu cynnydd yn y defnydd o hysbysiadau gwarchod gymunedol drwy gydweithio â’n asiantaethau partner. Mae defnyddio’r hysbysiadau hyn ynghyd â Gorchmynion Ymddygiad Cymunedol wedi dangos eu bod yn hynod o effeithiol, gan leihau lefelau ymddygiad gwrthgymdeithasol a throseddol mynych yn sylweddol yn ardaloedd Dinbych, Rhuthun a Loggerheads.

Cyffuriau

Mae gwarantau cyffuriau rhagweithiol yn parhau tarfu ar weithgarwch gwerthwyr cyffuriau, gyda chanlyniadau cadarnhaol wedi'u sicrhau mewn cyfeiriadau yn Rhuthun, Dinbych a Chapel Curig dros y misoedd diwethaf. O ganlyniad i droseddau sy’n gysylltiedig â gwerthu cyffuriau, mae nifer o arestiadau wedi’u gwneud yn ardal Dinbych. Gan weithio ynghyd â ‘Gweithdy Dinbych’, mae swyddogion cymdogaethau wedi ymweld ag ysgolion uwchradd lleol er mwyn ymgysylltu â disgyblion a chodi ymwybyddiaeth o beryglon defnyddio Cetamin.

Amlygrwydd, Ymgysylltu Cymunedol a Gwaith Partneriaeth

Mae atal troseddau a bod yn amlwg yn y gymuned yn mynd law yn llaw. Mae swyddogion patrôl a chymdogaethau felly’n treulio cymaint o amser â phosib allan yn y cymunedau maen nhw’n eu gwasanaethu. Mae swyddogion yn parhau ymdrin â ‘llecynnau’ sydd wedi’u hamlygu gan ddata dadansoddol fel ardaloedd problemus sy’n profi’r nifer fwyaf o ddigwyddiadau a adroddwyd.
Dros fisoedd yr haf, mae ein trefi wedi cynnal digwyddiadau sydd wedi denu torfeydd mawr. Trefnwyd ymgyrchoedd er mwyn rheoli digwyddiadau cerddoriaeth byw yn Llangollen a Rhuthun, ynghyd â sioeau amaethyddol blynyddol ledled yr ardal. Mae swyddogion cymdogaethau’n parhau ymgysylltu gydag aelodau’r cyhoedd drwy gymorthfeydd galw heibio wedi’u trefnu gan yr heddlu (Paned efo Plismon), sy’n agored i unrhyw un sydd yn dymuno codi pryderon. Yn dilyn llwyddiannau blaenorol, bydd ymgyrchoedd ar y cyd gyda Mewnfudo a Safonau Masnach yn parhau i ymdrin ag achosion sy'n ymwneud ag eiddo busnes yn yr ardal. Mae swyddogion cymdogaethau yn parhau gweithio’n agos efo cymdeithasau tai a gwasanaethau iechyd meddwl er mwyn ymdrin ag achosion mynych o niwsans i’r gymuned.