Carcharu dyn wnaeth werthu cyffuriau i rywun yn ei arddegau

Mae dyn 38 oed wedi cael ei garcharu am gyflenwi symiau sylweddol o getamin, MDMA a chanabis.

Ymddangosodd Steven Moorcroft, o Parker Close, Sefton, i'w ddedfrydu yn Llys y Goron yr Wyddgrug ar 19 Awst ar ôl cyfaddef yn flaenorol ei fod yn ymwneud hefo cyflenwi cyffuriau dosbarth A a B.

Dros gyfnod o ddau fis, roedd Moorcroft yn gwerthu'r cyffuriau i lanc 16 oed a fyddai'n teithio i Lannau Mersi o Gonwy, lle byddai'n eu gwerthu ymlaen.

Ar 5 Awst 2025, gweithredodd swyddogion warant yng nghyfeiriad y llanc lle atafaelwyd cyffuriau, arian parod a ffonau.

Roedd archwiliadau o'r ffôn yn cysylltu Moorcroft a'r llanc hefo symiau mawr o gyffuriau.

Ar 1 Ebrill 2026, arestiwyd Moorcroft.

Cafodd ei garcharu am naw mlynedd a naw mis.

Cafodd y llanc, na ellir ei enwi am resymau cyfreithiol, ei ddedfrydu yn y llys ieuenctid yn gynharach eleni.

Dywedodd Ditectif Brif Arolygydd Simon Kneale: "Moorcroft ydy'r chweched un a gafwyd yn euog fel rhan o Ymgyrch Noriker, sef ymchwiliad cymhleth o dan arweiniad y Tîm Troseddau Blaenoriaethol Canolog i gyflenwi cyffuriau Dosbarth A a B rhwng Gogledd Cymru a Glannau Mersi.

"Byddwn ni'n parhau i fynd ar drywydd y rhai sy'n gwerthu cyffuriau ar ein strydoedd ni ac yn achosi poen i'n cymunedau lleol ni.

"Fel rhan o'r ymchwiliad hwn 'da ni wedi diogelu plant a phobl fregus a oedd yn cael eu targedu i gyflenwi cyffuriau iddyn nhw.

"Nid oes lle i droseddau trefnedig yn ein cymunedau ni, a byddwn ni'n mynd ar drywydd y rhai sy'n cymryd rhan yn y math hwn o droseddu.

"'Da ni'n diolch i'r gymuned am eu help a'u gwybodaeth nhw a byddem yn annog unrhyw un sydd hefo gwybodaeth am gyffuriau yn eu hardal nhw i gysylltu hefo'r heddlu neu wneud adroddiad dienw i Crimestoppers ar 0800 555 111."

Mae help ar gael i unrhyw un yr effeithir arnyn nhw wrth ddefnyddio cetamin. Darganfyddwch fwy am yr ymgyrch aml-asiantaeth I Wish Someone Had Told Me.