Cwpwl oedrannus yn diolch i’r gwasanaethau brys am eu hachub ar Noswyl y Nadolig

Mae cwpwl  oedrannus wedi diolch i’r gwasanaethau brys am eu hachub, ar ôl i’w car dorri lawr ar Noswyl y Nadolig.

Mi roedd Mr a Mrs Wharfe, y ddau ohonyn nhw yn eu 80au, yn teithio ar hyd yr A470 o Landudno tuag at yr A55 pan ddechreuodd eu car  ollwng mwg, yn eu hatal rhag gweld y ffordd o’u blaenau.

Mi welodd rhywun y mwg wrth fynd heibio a ffonio 999.

Mewn llai na phum munud, roedd yr hen nain a thaid yn falch o weld yr heddlu’n cyrraedd.

Mae’r cwpwl wedi bod mewn cysylltiad ers hynny, er mwyn diolch i’r rhai a helpodd nhw. Dywedodd Mr Wharfe: “’Mi roedd llawer o fwg yn dod o’r car a doedden ni’n gweld dim, mi roedden ni’n meddwl bod y car ar dân.

“Mi roedd yr heddlu, y gwasanaeth tân, y gwasanaeth ambiwlans a’r gwasanaeth adfer i gyd mor garedig i ni.”

Mi roedd y ffordd ar gau  wrth i’r car gael ei gludo i ffwrdd gan y gwasanaeth adfer.

Dywedodd Mrs Wharfe: “Dw i’n rhannol ddall, ac mae fy ngŵr yn fyddar, felly mi roedden ni’n teimlo’n ofnus iawn ar ochr y ffordd brysur. Mi wnaeth y bobl ddaeth i’n helpu wneud i ni deimlo’n ddiogel a thawelu ein meddyliau.

“Mi roedden nhw’n amyneddgar iawn efo ni, er mai Noswyl y Nadolig oedd hi.”

Mi aeth  yr heddlu â’r hen nain a thaid adref,  ac mi wnaethon nhw fwynhau’r profiad o fod mewn car heddlu am y tro cyntaf!

Dywedodd Mr Wharfe: “Mi ddywedodd yr heddlu wrthon ni beidio â phoeni, ac na fuasen nhw’n ein gadael ni tan ein bod adre’n ddiogel.

“’Dw i mor falch nad oedd unrhyw un wedi’u hanafu, efo gymaint o bobl yn trio mynd adref ar gyfer y Nadolig.

“Mi gawsom ni ofal a sylw rhagorol gan y gweithwyr ambiwlans, wnaeth  wneud yn siŵr  ein bod yn iawn, ac mi wnaeth y gwasanaeth tân edrych dros y car cyn iddo fynd efo’r gwasanaeth adfer.”

Wedi cael ysgytiad ar ôl y profiad, dywedodd Mrs Wharfe: “’Da ni eisiau diolch i bawb ddaeth i’n helpu ni pan wnaethon ni dorri lawr.

“’Da ni’n teimlo mor falch a diolchgar bod gwasanaethau brys Gogledd Cymru mor ofalgar, trugarog a gwasanaethgar pan yn helpu aelodau’r cyhoedd. Mi dderbyniom ni wasanaeth gwerth chweil.”

Mi aeth y cwpwl adref efo swyddogion yr heddlu, wedi  eu hysgwyd ond wedi’u cysuro o ganlyniad  i’r gwasanaeth a dderbynion nhw. Mae’r cwpwl wedi bod yn briod ers dros 60 mlynedd, ac mi ddwedon nhw y bydden nhw’n dathlu Nos Galan drwy yfed llwnc destun i  weithwyr y gwasanaethau brys.