Ymgyrch Limit: Dros 100 o arestiadau am yrru dan ddylanwad alcohol a chyffuriau

Mae dros 100 o arestiadau wedi cael eu gwneud fel rhan o’n hymgyrch yn erbyn gyrru o dan ddylanwad alcohol a chyffuriau dros yr Ŵyl.

Ers cychwyn yr ymgyrch ar Ragfyr y cyntaf, mae 45 o arestiadau am yfed a gyrru a 59 o arestiadau am yrru o dan ddylanwad cyffuriau wedi cael eu gwneud ar draws y rhanbarth.

Mi fydd sawl un o’r rhai sydd wedi cael eu harestio am yfed a gyrru yn ymddangos o flaen y llysoedd dros yr wythnosau nesaf ac maent yn wynebu colli eu trwydded gyrru a derbyn dirwy. Mi fydd rhai hefyd yn wynebu cyfnod o garchar.

Mae’r rhai a gafodd eu harestio ar amheuaeth o yrru dan ddylanwad cyffuriau yn wynebu disgwyl am ganlyniadau profion pellach.

Meddai’r Arolygydd Leigh Evans o Uned Troseddau’r Ffyrdd: “Er gwaethaf ein rhybuddion niferus mae’n hynod o siomedig bod lleiafrif yn anwybyddu ein negeseuon ac yn peryglu bywydau eu hunain ac eraill.

“Mae gyrru tra o dan ddylanwad alcohol neu gyffuriau yn un o’r penderfyniadau mwyaf hunanol mae gyrwyr yn gallu gwneud a dwi’n erfyn ar fodurwyr i feddwl cyn iddynt benderfynu dreifio.

“Rydym yn disgwyl penwythnos prysur gan fydd nifer o bobl yn gorffen gwaith heddiw cyn y Nadolig, felly rydym yn disgwyl y bydd tafarndai yn hynod o brysur. Er ein bod ni eisiau i bawb fwynhau eu hunain rydym am i bawb ymddwyn yn gyfrifol. Mi wnawn barhau i gydweithio â phartneriaid gan gynnwys tafarndai er mwyn sicrhau penwythnos diogel i bawb.

“Rydym wedi ymrwymo i ddiogelu’r ffyrdd i bawb a byddwn yn parhau i dargedu’r rhai sy’n peryglu bywydau pobl eraill. Peidiwch ag yfed o dan ddylanwad alcohol neu gyffuriau – mae hyd yn oed cyfanswm bach yn gallu effeithio ar eich gallu i yrru’n ddiogel. Peidiwch â gadael i’ch teulu ddioddef oherwydd eich camgymeriad chi.

Os credwch fod rhywun yn gyrru a ddim yn gymwys i wneud hynny, riportiwch o ar unwaith i’r heddlu ar 101 (neu 999 os oes rhywbeth peryglus ar fin digwydd) neu ffoniwch Crimestoppers yn ddienw ar 0800 555 111.

Gall defnyddwyr y cyfryngau cymdeithasol ddilyn yr ymgyrch drwy’r hashnodau #OpLimit a #5Angheuol

Nodiadau:

• Yn 2022, fe wnaeth Heddlu Gogledd Cymru 914 o arestiadau am yrru dan ddylanwad alcohol a 798 am yrru o dan ddylanwad cyffuriau.
• Roedd 29% o yrwyr a gafodd eu dal yn gyrru o dan ddylanwad cyffuriau yng Ngogledd Cymru rhwng 2018 a 2022 rhwng 16 a 25 oed. Roedd 1/6 o’r profion cyffuriau a roddwyd ar gyfer canabis.
• Roedd 18% o yrwyr a gafodd eu dal yn gyrru ac yfed yng Ngogledd Cymru rhwng 2018 a 20222 rhwng 16 a 25 oed.