Ymgyrch ar y cyd yn targedu cyflenwi cyffuriau

Cafodd dryll tanio ffug, swm sylweddol o gyffuriau Dosbarth A ac arian parod ynghyd â sawl cerbyd eu hatafaelu dros y dyddiau diwethaf yn dilyn ymgyrch ar y cyd rhwng Heddlu Gogledd Cymru a Heddlu Glannau Mersi.

Ar 25 Mehefin (dydd Gwener) a 27 Mehefin (dydd Sul), cynhaliodd swyddogion o Dîm Rhwystro Heddlu Gogledd Cymru ynghyd â swyddogion plismona lleol, ddiwrnod o weithredu o dan faner Ymgyrch Medusa Heddlu Glannau Mersi er mwyn targedu Llinellau Cyffuriau.

Cafodd patrolau a gwiriadau eu gweithredu yn sir y Fflint a’r Rhyl ynghyd â rhannau o Lerpwl.

Cafwyd sawl arestiad, gan gynnwys dyn a welwyd yn dreifio cerbyd Volvo yn ardal Shotton. Roedd gan y car blatiau cerbyd ffug ac fe wrthododd y gyrrwr stopio. Fe yrrodd i mewn i wrych ac fe redodd i ffwrdd. Fe wnaeth swyddogion redeg ar ei ôl ac fe gafodd ei arestio ar ôl dod o hyd i gyffuriau Dosbarth A yn ei gerbyd. Cafodd ei arestio ar amheuaeth o yrru heb stopio, gyrru peryglus, dwyn cerbyd, gyrru tra dan waharddiad a throseddau cyffuriau.

Cafodd dyn ei arestio yn Nhreffynnon ar ôl cael ei ddal yn gwerthu cyffuriau. Yn dilyn chwilio’r dyn darganfuwyd sawl pecyn bach o bowdwr gwyn, a gredir ei fod yn grac cocên, ynghyd â swm sylweddol o arian parod a ffôn symudol.

Cafodd bachgen ifanc ei arestio yn y Fflint ar ôl i’r heddlu stopio a chwilio. Darganfuwyd ei fod yn cuddio dryll tanio ffug. Mae eisoes wedi cael ei ryddhau tra bod ymholiadau’n parhau.

Cafodd dyn arall ei arestio yn Nhreffynnon ar amheuaeth o werthu cyffuriau ar ôl cael ei ganfod hefo £5,000 mewn arian parod.

Cafodd arestiadau gyrru dan ddylanwad cyffuriau eu gwneud yn ardaloedd Shotton a Chei Connah. Cafodd sawl un eu stopio a’u chwilio yn gysylltiedig â throseddau cyffuriau. Cafodd sawl tocyn cosb eu rhoi i yrwyr am droseddau megis goleuadau a theiars diffygiol, defnyddio ffôn symudol wrth yrru, gyrru heb wisgo gwregys diogelwch, dim MOT a llwythi peryglus.

Cafodd 16 cerbyd eu hatafaelu hefyd am amryw o droseddau gan gynnwys dim yswiriant a chyflenwi cyffuriau.

Dywedodd y Prif Arolygydd Jon Aspinall o Heddlu Gogledd Cymru: “Mae’r gweithgarwch diweddar wedi digwydd oherwydd y gwaith rydym yn ei wneud bob dydd er mwyn arestio’r rhai hynny sy’n gysylltiedig â’r math yma o droseddu gan gynnwys Llinellau Cyffuriau.  Mae’n esiampl wych o’r llwyddiannau rydym yn ei gyflawni ar y cyd drwy gydweithio hefo Heddlu Glannau Mersi.

“Nid yw troseddwyr sy’n gysylltiedig â Llinellau Cyffuriau yn parchu ffiniau, y cymunedau maent yn amharu arnynt a’r bobl maent yn eu twyllo er mwyn troseddu.

“Tra bod ein swyddogion ni yn gweithio mewn ardaloedd lleol, roedd swyddogion Heddlu Glannau Mersi yn gwirio’r rhwydweithiau teithio gan dargedu bysiau a threnau a oedd ar eu ffordd i Ogledd Cymru. Fe wnawn barhau i wneud bob dim er mwyn rhwystro gangiau gan nad oes lle iddynt yma yng ngogledd Cymru.”