Troseddwyr Rhyw Cofrestredig

Mae’r Gofrestr Troseddwyr Rhyw yn cofnodi manylion y bobl a gafodd eu dyfarnu’n euog, sydd wedi cael rhybuddiad neu sydd yn y carchar am drosedd rywiol ers 1997.

Mae diffiniad o drosedd rywiol yn cynnwys ystod eang o droseddau o voyeuriaeth i dreisio.

Mae pob oedolyn sy’n cael ei ddyfarnu’n euog, ei rybuddio neu’n cael ei garcharu am drosedd rywiol yn erbyn plentyn yn cael ei roi ar y gofrestr. Fel arall, mae’r math o drosedd a’r ddedfryd yn pennu os bydd rhaid mynd ar y rhestr.

Cofrestru gyda’r heddlu

Mae’n rhaid i droseddwyr rhyw gofrestru gyda ni yn bersonol, o fewn tri diwrnod o gael eu cyhuddo, eu dedfrydu, ar ôl cael rhybuddiad neu ar ôl cael eu rhyddhau o’r carchar am drosedd rywiol.

Mae’n rhaid iddyn nhw ddangos llun a rhoi’r manylion canlynol i ni:

• enw
• unrhyw enwau eraill maen nhw’n eu defnyddio
  cyfeiriad
• unrhyw gyfeiriadau eraill lle maen nhw’n aros yn rheolaidd
  dyddiad geni
• manylion cyfrif banc
• rhif Yswiriant Gwladol
• manylion pasbort
• manylion eu heuogfarn

Mae’n rhaid iddyn nhw roi gwybod i ni hefyd os ydyn nhw:

• yn byw gyda phlentyn
• yn aros mewn cartref gyda phlentyn am 12 awr neu fwy
• yn bwriadu teithio dramor, o leiaf 7 diwrnod cyn iddyn nhw deithio

Mae’n rhaid i droseddwyr ddweud wrthym os bydd unrhyw un o’r manylion hyn yn newid, cyn pen tri diwrnod o’r newid.

Os nad oes unrhyw newidiadau, mae’n rhaid iddyn nhw ail gofrestru bob blwyddyn.

Os nad oes gan droseddwr gyfeiriad parhaol, mae’n rhaid iddyn nhw fynd i orsaf yr heddlu bob saith diwrnod i roi gwybod i ni lle gallwn ddod o hyd iddyn nhw.

Byddwn yn ymweld â throseddwyr yn y cartref i asesu risg a gwneud yn siŵr eu bod yn cofrestru ac yn rhoi manylion i ni pan fo angen hynny.

Mae gennym y pŵer i gymryd lluniau ac olion bysedd troseddwr.

Sut mae troseddwyr rhyw yn cael eu rheoli

Mae Troseddwyr Rhyw Cofrestredig yn cael eu rheoli yn y gymuned gan heddlu arbenigol a swyddogion prawf.

Caiff y swyddogion hyn gymorth gan sefydliadau eraill gan gynnwys gwasanaethau cymdeithasol, adrannau tai y cyngor, Llu’r Ffiniau, yr Adran Gwaith a Phensiynau, ac arbenigwyr iechyd meddwl.

Mae troseddwyr rhyw yn aml yn cael eu rhyddhau o’r carchar ‘ar drwydded’. Mae hyn yn golygu bod ganddyn nhw reolau penodol y mae’n rhaid eu dilyn, a gallai methu â’u dilyn olygu y byddai’n rhaid dychwelyd i’r carchar.

Gallwn hefyd wneud cais am Orchmynion Atal Niwed Rhywiol (SHPO) ar gyfer y canlynol:

• atal troseddwyr rhyw cofrestredig rhag gwneud gweithgareddau penodol neu rhag mynd i lefydd lle mae plant yn ymgynnull, fel mannau chwarae ac ysgolion
• gwneud i droseddwyr rhyw cofrestredig wneud rhywbeth, fel rhoi gwybod i ni os ydyn nhw wedi cael rhif ffôn symudol newydd o fewn 3 diwrnod

Os ydy rhywun yn torri rheolau eu Gorchymyn Atal Niwed Rhywiol gallan nhw gael eu herlyn mewn llys.

Am faint mae troseddwyr yn aros ar y gofrestr

Mae hyn yn dibynnu ar hyd y ddedfryd ar gyfer eu trosedd.

Os cawson nhw eu dedfrydu i garchar am 30 mis neu fwy maen nhw’n aros ar y gofrestr am gyfnod amhenodol.

Mae pobl sydd wedi cael rhybuddiad (heb gael eu dyfarnu’n euog) am drais rywiol yn aros ar y gofrestr am 2 flynedd.

Cynllun Datgelu Troseddwyr Rhyw â Phlant (Cyfraith Sarah)

Mae Cynllun Datgelu Troseddwr Rhyw â Phlant (CSODS) yn caniatáu i chi ofyn i’r heddlu’n ffurfiol os oes rhywun sydd â chyswllt un i un â phlentyn:

• yn droseddwr rhyw cofrestredig
• yn peri risg hysbys i’r plentyn am unrhyw reswm arall

Nid yw’n gyfraith ond mae weithiau’n cael ei alw’n ‘Cyfraith Sarah’.

Sut i riportio troseddwr rhyw os yw wedi torri amodau trwydded neu orchymyn

Os ydych chi’n meddwl bod troseddwr rhyw yn torri rheolau eu trwydded neu eu Gorchymyn Atal Niwed Rhywiol, rhowch wybod i ni. Gallai eich gwybodaeth ein helpu ni i amddiffyn oedolion neu blant agored i niwed.

Os ydych chi’n amau bod rhywun mewn perygl uniongyrchol, ffoniwch 999 nawr. Os oes gennych nam ar eich clyw neu’ch lleferydd, defnyddiwch ein gwasanaeth ffôn testun 18000 neu anfonwch neges destun atom ar 999 os ydych chi wedi cofrestru ymlaen llaw gyda'r gwasanaeth SMS Brys.

Os nad yw’n argyfwng, gallwch:

• ffonio 101
• os oes gennych nam ar eich clyw neu’ch lleferydd, defnyddiwch ein gwasanaeth ffôn testun 18001 101
• ewch i orsaf yr heddlu
• cysylltwch â Crimestoppers yn gyfrinachol ac yn ddienw