Prosiect Kraken
Beth yw Prosiect Kraken?
Menter genedlaethol yw Prosiect Kraken i godi ymwybyddiaeth y cyhoedd o derfysgaeth a gweithgarwch troseddol neu amheus o amgylch ein harfordiroedd a’n ffiniau. Mae hyn yn cynnwys lleoliadau fel:
- marinas
- angorfeydd
- porthladdoedd llai
- dociau
- ar y dŵr
Mae mathau cyffredin o droseddau arfordirol yn cynnwys:
- lladrad
- smyglo
- difrod troseddol
Beth i gadw llygad amdanynt
Pobl amheus
Os gwelwch bobl yn gwneud unrhyw un o’r canlynol, gall fod yn arwydd o weithgarwch troseddol neu derfysgol:
- defnyddio dyfeisiau fideo i recordio gorsafoedd pŵer, safleoedd milwrol, pontydd, neu seilwaith hanfodol
- tynnu lluniau, neu’n gwneud nodiadau neu luniadau o ardaloedd â chyfyngiadau a ‘safleoedd agored i ymosodiadau’, megis gorsafoedd pŵer
- osgoi ateb cwestiynau cyffredin ynglŷn â chychod, osgoi cyswllt â phobl eraill yn fwriadol, neu osgoi tynnu sylw atynt eu hunain
- rhoi gwrthrychau yn y dŵr ger pontydd, pibellau, neu seilwaith
- gwneud taliadau mawr mewn arian parod, neu ofyn am estyniad dyddiol i angorfa mewn marina neu borthladd
- prynu neu gludo offer anarferol, cemegau, lifrai, neu ddulliau adnabod
- gwneud ymdrechion i gyfeirio neu arwain cychod oddi wrth y lan
- loetran heb unrhyw synnwyr o bwrpas neu ymddwyn yn nerfus
Cerbydau amheus
Mae arwyddion posibl eraill o droseddau arfordirol yn cynnwys:
- cychod anarferol mewn marina, neu rywun sy’n ymddangos fel pe bai’n profi diogelwch marina neu ardal â chyfyngiadau i weld a ydynt yn cael eu herio
- llongau siarter neu gychod llogi amheus
- cerbydau wedi’u parcio mewn mannau anghysbell ar hyd dyfrffyrdd
- cychod yn dadlwytho pobl sy’n edrych wedi dychryn neu’n amheus
- cychod yn dadlwytho pecynnau
Arwyddion rhybudd i weithwyr morol
Os ydych yn gweithio yn y diwydiant morol, dylech hefyd gadw llygad am y mathau canlynol o weithgarwch amheus:
- criw nerfus sydd ddim fel petaent yn gwybod protocolau morol
- cychod ag addasiadau anarferol neu sydd ag arwyddion o fân ddifrod
- pobl yn siartro neu logi cychod ac yna’n gwneud ceisiadau anarferol, megis gofyn i newid llwybr neu fynd yn nes at ardaloedd â chyfyngiadau
- pobl sy’n ceisio cael gwaith ar safleoedd sensitif neu gyda chyflenwyr sydd â mynediad i ardaloedd â chyfyngiadau neu safleoedd agored i ymosodiadau
Beth allwch chi ei wneud am y peth
Os ydych yn amau gweithgarwch terfysgol posibl gallwch riportio gweithgarwch terfysgol posibl ar-lein , neu ar y Llinell Gymorth Gwrthderfysgaeth 0800 789 321, neu os ydych yn amau bod perygl ar y pryd, symudwch i ffwrdd a ffoniwch 999 nawr.
Neu ffoniwch y Llinell Troseddau Arfordirol ar 0800 011 3304 a dyfynnu ‘Project Kraken’.
Os oes gennych nam ar eich clyw neu’ch lleferydd, defnyddiwch ein gwasanaeth ffôn testun 18000 neu anfonwch neges destun atom ar 999 os ydych wedi cofrestru ymlaen llaw gyda’r gwasanaeth SMS brys.
Neu gallwch riportio eich gwybodaeth ar-lein i Crimestoppers.
Cofiwch: peidiwch â rhoi eich hun mewn sefyllfa beryglus na chymryd unrhyw risgiau; peidiwch â mynd at unrhyw un rydych chi’n ei amau. Rhowch wybod i ni cyn gynted ag y gallwch.