Help os nad ydych chi’n siŵr a ydych chi’n mynd i riportio treisio neu ymosodiad rhywiol
Rydyn ni’n gwybod y gall fod yn anodd riportio treisio neu ymosodiad rhywiol. Rydyn ni’n deall bod llawer o resymau y mae pobl yn dewis peidio â’u riportio, a'ch dewis chi yw hi bob amser.
Os nad ydych chi’n siŵr beth i'w wneud, gallai'r wybodaeth ar y dudalen hon eich helpu i benderfynu ai riportio yw’r cam cywir i chi. Rydyn ni yma i chi a byddwn yn gofalu amdanoch beth bynnag y byddwch yn penderfynu ei wneud.
Ac os ydych chi’n barod, dyma sut i riportio treisio ac ymosodiadau rhywiol.
Ni wnawn ni’ch barnu chi
Os penderfynwch chi riportio’r peth inni, fyddwn ni ddim yn eich barnu ar sail unrhyw un o'r mythau cyffredin ynghylch treisio.
Does dim ots pwy ydych chi na beth sydd wedi digwydd ichi, mae gennych chi’r un hawl i gael eich clywed ac i gael cyfiawnder â phawb arall.
Does dim terfyn amser
Gallwch riportio treisio neu ymosodiad rhywiol ni waeth pa mor hir yn ôl y digwyddodd. Does dim terfyn amser a does dim ots os na allwch chi gofio'r holl fanylion.
Rhesymau y mae pobl yn penderfynu riportio
Efallai na fydd yr un o'r rhain yn gymwys i chi. Mae pob penderfyniad i riportio neu beidio yn bersonol. Ond dyma rai rhesymau mae pobl yn dweud eu bod wedi penderfynu riportio treisio ac ymosodiadau rhywiol.
- Gall helpu'n emosiynol fel rhan o'r broses ymadfer.
- Lle digwyddodd treisio neu ymosodiad rhywiol mewn perthynas, fel rhan o batrwm o gam-drin domestig, gall riportio helpu i roi terfyn ar y berthynas a dianc rhag y trais.
- Gall fod yn gam cyntaf ar y ffordd i ddyfarniad euog yn y llys.
- Gall helpu i hawlio iawndal.
- Gall ein helpu ni i ddatrys achosion eraill ac atal yr ymosodwr rhag ymosod ar rywun arall.
Os byddwch chi'n riportio trosedd a’ch bod yn anfodlon arnon ni
Mae gennych chi hawl i gael eich trin â pharch ac urddas bob amser. Ond rydyn ni’n gwybod y gall eich profiad weithiau deimlo'n annheg, yn ansensitif neu'n waeth.
Os bydd hyn yn digwydd i chi, rydyn ni am eich cefnogi a gwneud pethau'n well. Os na allwn ni, rydyn ni am ei gwneud hi mor hawdd â phosibl ichi ein dwyn i gyfrif.
Os ydych chi’n anfodlon ar ein penderfyniad i beidio â chyhuddo rhywun neu drosglwyddo’ch achos i Wasanaeth Erlyn y Goron, efallai y gallech ddefnyddio cynllun Hawl Dioddefwr i Adolygiad (VRR).
Os ydych chi'n anfodlon ar unrhyw beth arall ynglŷn â’r ffordd rydyn ni wedi'ch trin chi, fe allwch chi:
- gyflwyno cwyn yn ein herbyn ni ar-lein gan ddefnyddio’n gwasanaeth cwyno ar-lein
- cysylltu â’r Comisiynydd Dioddefwyr a benodwyd gan y Llywodraeth i gynrychioli dioddefwyr a thystion troseddau
Mewnfudo
Ni waeth beth fo’ch statws mewnfudo, os byddwch yn riportio treisio, ymosodiad rhywiol neu drosedd arall inni, byddwn yn eich trin fel goroeswr a dioddefwr trosedd yn gyntaf.
Ond, os cawn ni wybod yn ystod ymchwiliad y gallech fod yn y wlad yn anghyfreithlon, efallai y byddwn yn rhannu gwybodaeth â’r adran Gorfodi Mewnfudo, a fydd yn penderfynu beth i'w wneud.
Gall hyn beri pryder, ond rydyn ni’n credu ei bod yn bwysig dweud wrthoch chi am y posibilrwydd, er mwyn ichi allu gwneud dewis gwybodus am beth i'w wneud.
Os ydych chi’n poeni am hyn, mae yna wasanaethau cymorth a all ddweud wrthoch chi am eich hawliau a'ch helpu i benderfynu beth i'w wneud.
Sefydliad i fenywod sy'n ymroi i fynd i'r afael â thrais yn erbyn menywod a merched o gymunedau du a lleiafrifol.
Mae’r sefydliadau sy’n aelodau o Imkaan yn cynnig cymorth arbenigol.
Cymorth i oroeswyr gwrywaidd o dras Asiaidd, Affricanaidd ac Affricanaidd-Garibïaidd.
Gyda phwy arall allwch chi siarad
Os hoffech chi drafod eich penderfyniad cyn riportio trosedd i ni, neu os hoffech chi ei riportio iddyn nhw yn lle riportio i ni, gallwch gysylltu â Chanolfan Atgyfeirio Ymosodiadau Rhywiol (SARC) neu sefydliad arall i drafod hyn yn gyfrinachol.