Carchar i ddyn o Wrecsam am droseddau trais domestig

Mae dyn 32 oed o Wrecsam wnaeth ymosod yn dreisgar a rheoli ei cyn gymar wedi ei garcharu.

Mi gyflawnodd Craig Griffiths, o Ffordd y Lofa, gam-driniaeth emosiynol a chorfforol dros gyfnod o bedair blynedd.

Mi gafodd ei garcharu am ddwy flynedd a 10 mis yn Llys y Goron yr Wyddgrug ar ddydd Mawrth 13 Mai, ar ôl cyfaddef ymddygiad gorfodol a rheolaethol, tagu bwriadol ac ymosodiad.

Mi gyfaddefodd hefyd i gyhuddiad o stelcian.

Ym mis Tachwedd llynedd, mi gysylltodd y dioddefwr efo’r heddlu i ddweud bod ei chyn gymar yn ei chartref, ac ‘roedd hi eisiau iddo adael ar ôl iddo ymosod arni.

Mi gafodd ei arestio o dan amheuaeth o ymosodiad domestig a thagu nad oedd yn angheuol.

Yn dilyn ei arestiad, mi ddatgelodd y dioddefwr i swyddogion bod Griffiths wedi ei tharo yn ei hwyneb, ei chicio yn ei chefn a chydio o amgylch ei gwddw, gan ei hatal rhag anadlu.

Mi osodwyd amodau mechnïaeth iddo beidio â chysylltu efo’r dioddefwr, ond ni wnaeth Griffiths gydymffurfio.

Ym mis Rhagfyr, mi ‘roedd y dioddefwr adref yn gwylio’r teledu, pan gysylltodd y teledu i Alexa, lle ymddangosodd lun o’r ddau ynghyd â neges gan y diffynnydd.

Yna, mi gafodd ei gyhuddo a’i remandio i’r ddalfa.

Dywedodd y swyddog ymchwilio, Cwnstabl Martin Brannan: “Mi ‘roedd hyn yn brofiad hynod o ofidus i’r dioddefwr, oedd yn ofni am ei bywyd yn dilyn ymgyrch Griffiths o gam-driniaeth tuag ati.

“’Dwi’n cymeradwyo ei dewrder wrth ddod at yr heddlu a rhoi datganiad.

“Mae’r achos hwn yn anfon neges eglur na fyddai Heddlu Gogledd Cymru yn goddef trais yn erbyn merched a genethod.”

Mi dderbyniodd Griffith orchymyn atal sy’n para deng mlynedd er mwyn gwarchod y dioddefwr.