Carchar i ddyn ar ôl byrgleriaethau yn Llanberis

Mae dyn gyflawnodd fyrgleriaeth mewn tŷ cwpwl tra ‘roedden nhw ar eu gwyliau wedi ei garcharu.

Mi ymddangosodd Mark Anthony Goodier, 36 oed, o Landdaniel, Gaerwen, yn Llys y Goron Caernarfon ar ddydd Mawrth, 18 Mawrth, ar ôl cyfaddef i ddau drosedd o fyrgleriaeth a thrafod nwyddau wedi’u dwyn.

Yn ystod nos Iau, 19 Rhagfyr 2024, mi dorrodd Goodier i fewn i gartref ar Ffordd yr Orsaf, Llanberis, tra ‘roedd y teulu i ffwrdd ar wyliau.

Mi wnaeth chwilota drwy’r tŷ, gan ddwyn nifer o eitemau gwerthfawr a char y teulu.

Yn hwyrach ymlaen, yn ystod oriau mân dydd Gwener, 20 Rhagfyr, mi geisiodd Goodier gael mynediad i adeilad busnes ar Stryd y Farchnad, drwy ddifrodi’r system larwm a phanel gwydr mewn drws. Ni chafodd eiddo ei ddwyn.

Mi gafodd Goodier ei garcharu am ddwy flynedd a phum mis.

Mi dderbyniodd hefyd orchymyn atal, er mwyn gwarchod y dioddefwyr, sy’n para 10 mlynedd.

Dywedodd y Ditectif Gwnstabl Will Leon-Portillo: “Mi ‘roedd hwn yn brofiad hynod o boenus i’r dioddefwyr, a’u cartref wedi’i chwilota tra ‘roedden nhw i ffwrdd ar wyliau.

“Mae’r digwyddiad hwn wedi cael effaith ddifrifol arnyn nhw, ac wedi eu gadael yn teimlo’n anniogel yn eu cartref eu hunain, yn ogystal â cholli nifer o eitemau o werth personol.

“Ni allai unrhyw ddedfryd ddadwneud niwed gweithrediadau Goodier, ond ‘dwi’n gobeithio ein bod ni’n tawelu meddwl y cyhoedd drwy barhau i weithio’n ddi-baid er mwyn gwarchod diogelwch ein cymunedau ni.”