Carchar i dyn ar ôl gorfodi bechgyn anfon lluniau anweddus wrth iddo smalio bod yn ferch ifanc ar-lein

Mae athro ysgol gynradd wnaeth smalio bod yn ferch ifanc ar-lein a gorfodi plant anfon lluniau anweddus o’u hunain wedi ei garcharu.

Mi wadodd Daniel Fuge, 38 oed, o Prospect Road, Dorchester, gynt o Wrecsam, greu lluniau anweddus, a thri trosedd o annog plentyn ymwneud â gweithgaredd rhywiol.

Ond mi ganfu rheithgor ei fod yn euog o bob un o’r cyhuddiadau, yn dilyn achos yn Llys y Goron yr Wyddgrug ym mis Chwefror.

Mi ymddangosodd yn Llys y Goron yr Wyddgrug heddiw, dydd Llun, 31 Mawrth, ar gyfer dedfryd. Fe gafodd ddeng mlynedd yn y carchar.

Mi dderbyniodd Fuge ofynion yn ôl y gofrestr troseddwyr rhywiol a gorchymyn atal niwed rhywiol, efo’r ddau’n para benagored.

Mae hefyd wedi ei wahardd rhag gweithio efo plant ac oedolion bregus, ac fe gafodd orchymyn yn para am ddeng mlynedd, yn gwahardd Fuge rhag cysylltu efo’i ddioddefwyr.

Mi wnaeth Fuge ofyn a rhoi pwysau ar ddau bachgen am ddeunydd anweddus yn ddi-baid drwy Snapchat, cyn annog un i anfon fideo yn cyflawni gweithred rywiol.

Mi ddosbarthwyd ddeunydd un o’r dioddefwyr o gwmpas ei ysgol.

Yn dilyn ymchwiliad heddlu drwyadl, mi atafaelwyd ei declynnau o gartref ei rieni yn Wrecsam. Ar ôl eu harchwilio ymhellach, mi nodwyd dioddefwr arall.

Mi gafodd ei gyhuddo ym mis Mawrth 2024.

Ar yr adeg pan gyflawnodd y troseddau, mi ‘roedd Fuge yn gweithio fel athro ysgol gynradd yn Saudi Arabia, ac mi smaliodd bod yn ferch ifanc ar-lein pan ddychwelodd adref yn ystod y gwyliau ysgol.

Mi ddefnyddiodd declyn oedd ar rwydwaith rhithwir breifat (VPN), a ddefnyddir er mwyn amgryptio ei gysylltiad i’r we a chuddio ei leoliad a’i hunaniaeth.

Dywedodd Ditectif Gwnstabl James Hughes, wnaeth arwain yr ymchwiliad: “Mi hoffwn ganmol y dioddefwyr yn yr achos hwn, am eu dewrder drwy gydol yr ymchwiliad.

“Mi wnaeth Daniel Fuge ddwyn eu diniweidrwydd wrth iddo smalio bod yn ferch ifanc, er mwyn eu twyllo i anfon lluniau anweddus er mwyn bodloni ei chwantau rhywiol ffiaidd.

“Mae’r negeseuon sydd wedi’u hadfer fel rhan o’r ymchwiliad yn dangos ei fod yn gwybod bod ei ddioddefwyr ond yn 13 oed ar y pryd. Er hyn, mi barhaodd efo’i ymddygiad ysglyfaethus.

“Ni ddangosodd unrhyw ots ynglŷn â’r effeithiau mae ei weithrediadau wedi’u cael ar y dioddefwyr na’u teuluoedd.

“’Dwi’n annog unrhyw un sydd erioed wedi cael profiad tebyg i’n cysylltu ni a  pheidio â dioddef yn dawel. Mi wnawn ni wrando a’ch helpu chi.”