Carchar i ddyn o Sir y Fflint am dreisio plentyn a thynnu lluniau dan dîn o blant
Cynnwys y prif erthygl
Mae dyn o Sir y Fflint wedi’i garcharu am dreisio plentyn, yn ogystal â nifer o droseddau rhywiol, gan gynnwys tynnu lluniau dan dîn o blant.
Mi ymddangosodd Reuben Swansborough, 38 oed, o Saltney, gerbron Llys y Goron yr Wyddgrug ar gyfer dedfryd heddiw, dydd Mercher 26 Mawrth, ar ôl cyfaddef 26 trosedd.
Mi ‘roedd y rhain yn cynnwys treisio plentyn, annog plentyn i ymwneud â gweithgaredd rhywiol, ymosodiad rhywiol, tynnu a chreu lluniau anweddus o blentyn, voyeuriaeth a meddiant o lun pornograffig eithafol.
Mi gafodd Swansborough ei garcharu am 18 mlynedd a deg mis, ac mi wnaiff gyflawni bum mlynedd ychwanegol ar gyfnod trwydded estynedig.
Mae’n rhaid iddo gofrestru fel troseddwr rhywiol am oes, ac mi dderbyniodd orchymyn atal niwed rhywiol penagored.
Mi dderbyniodd hefyd orchymyn atal sy’n para 10 mlynedd, er mwyn diogelu un o’r dioddefwyr.
Mi ddaeth Swansborough i sylw’r heddlu ym mis Ebrill 2024, pan riportiodd ddigwyddiad ei hun.
Mi lansiodd yr heddlu ymchwiliad, ac mi gafodd ei arestio am nifer o droseddau rhywiol yn erbyn plentyn.
Mi ddatgelodd ymchwiliadau digidol o declynnau symudol Swansborough gasgliad mawr o dros 250,000 o ddelweddau anweddus, yn ogystal â fideos anweddus gan gynnwys troseddau dynnu lluniau dan dîn o blant.
Yn siarad ar ôl y ddedfryd heddiw, dywedodd y swyddog ymchwilio, Ditectif Gwnstabl Victoria Griffiths: “Nid ydy Reuben Swansborough wedi dangos unrhyw edifeirwch ynglŷn â’i droseddau, sydd wedi cael effaith trychinebus ar yr holl ddioddefwyr, yn ogystal â’u teuluoedd.
“Mi ddioddefodd un o’r dioddefwyr gamdriniaeth rhywiol erchyll wrth law Swansborough, a does dim amheuaeth gen i buasai o wedi parhau troseddu os na fuasai wedi’i atal rhag gwneud.
“Er na fydd dedfryd heddiw yn cael gwared ar y trawma a achoswyd, ‘dwi’n gobeithio fydd yn rhoi rhywfaint o gysur i’r dioddefwyr, a’r gymuned ehangach, gan wybod na fydd y dyn peryglus a chyfrwys hwn yn gallu achosi ychwaneg o niwed i unrhyw un arall.
“’Dwi’n annog unrhyw un sydd wedi cael profiad o’r fath ymddygiad gysylltu efo ni a pheidio â dioddef yn dawel. Mi wnawn ni wrando a’ch helpu chi.”