Carchar i ddyn am dreisio merch yn ei harddegau

Mae dyn 29 oed o Wynedd wedi ei garcharu am dreisio merch yn ei harddegau.

Mi ymddangosodd Kyle Martin John Parry, gynt o ardal Caernarfon, yn Llys y Goron Caernarfon ar ddydd Mawrth, 10 Mehefin.

Mi gafodd Parry, oedd efo euogfarnau blaenorol am ymosod yn rhywiol ar fachgen pump oed yn 2017, ddedfryd o wyth mlynedd a naw mis yn y carchar am y troseddau hanesyddol.

Mi ‘roedd y ddedfryd yn gysylltiedig â chyhuddiadau o weithgaredd rhywiol â phlentyn, ac ymosodiad rhywiol drwy dreiddiad.

Mi roedd y dioddefwr yn 15 oed pan ddigwyddodd y troseddau yn 2015.

Dywedodd Ditectif Gwnstabl Dominique Swift: “Mi hoffwn i ganmol dewrder y dioddefwr yn yr achos hwn, ac am ymddiried ynddo ni ac am siarad efo ni.

“Mi ddangosodd hi ddewrder rhyfeddol yn y llys heddiw, ac mi ddewisodd hi ddarllen ei Datganiad Personol Dioddefwr yn uniongyrchol i’r dyn oedd wedi ymosod arni hi.

“Mae hyn yn neges i bobl eraill sydd efallai’n dioddef mewn distawrwydd. Mi wnawn ni wrando. Mi wnawn ni bob dim allwn ni er mwyn dod â’r rhai sy’n peri niwed rhywiol o flaen eu gwell. ‘Da ni yma er mwyn eich cynorthwyo chi.”

‘Da ni’n cymryd bob hysbysiad o gam-drin rhywiol o ddifri ac mi wnawn eu hymchwilio yn drwyadl, waeth pa mor ddiweddar neu hir yn ôl mae wedi digwydd.

‘Da i’n annog unrhyw un sydd wedi dioddef cam-drin rhywiol yn y gorffennol i ddod atom ni. ‘Da ni yma i wrando ac i’ch cynorthwyo chi.

Wyddoch chi bod dioddefwyr y mwyafrif o droseddau rhywiol yn cael  aros yn anhysbys gydol eu oes?

Mae hyn yn golygu na fydd eich manylion byth yn cael eu rhyddhau yn y cyfryngau.

‘Da ni’n ymrwymo i ddiogelu eich preifatrwydd a’ch lles, gan sicrhau bod pob hysbysiad yn cael ei ymchwilio’n drylwyr.