Carchar i ddyn o Wrecsam am droseddau trais domestig

Mae dyn 26 oed wedi ei garcharu am droseddau trais domestig ar gyn gymar.

Mi gyfaddefodd Cailum Jones, o Wenfro, Wrecsam, achosi niwed corfforol difrifol a dau drosedd o ymosod ar y dioddefwr.

Mi ymddangosodd yn Llys y Goron, yr Wyddgrug, heddiw, dydd Iau 6 Chwefror, lle gafodd ei garcharu am ddwy flynedd.

Mi gafodd hefyd orchymyn atal sy’n para pum mlynedd, er mwyn gwarchod y dioddefwr.

Yn ystod oriau mân 11 Tachwedd y llynedd, mi aeth swyddogion i dŷ’r dioddefwr ar ôl i Jones ei dyrnu yn ei hwyneb, gan friwio’i hwyneb uwchben ei gwefus a thorri ei dannedd.

Mi gafodd ei arestio ac yna ei ryddhau ar fechnïaeth, efo amodau i beidio â chysylltu efo’r dioddefwr.

Yn dilyn ei arestiad, mi ddatgelodd y dioddefwr bod Jones wedi ymosod arni hi nifer o weithiau dros gyfnod o 12 mis.

Mi riportiodd hi ynglŷn â dau achlysur, ei fod wedi cydio yn ei gwallt ac ymosod arni yn ystod ffrae.

Dyddiau ar ôl ei arestiad, mi dorrodd Jones amodau ei fechnïaeth ac yna mi gafodd ei gyhuddo.

Dywedodd y swyddog ymchwilio, y Ditectif Gwnstabl Troy Williams: “Does dim esgus am ymddygiad treisgar tuag at ferched, ac ni fyddwn ni’n ei oddef.

“’Dwi’n cymeradwyo dewrder y dioddefwr, sy’n anffodus yn dal i ddioddef effeithiau corfforol ac emosiynol y digwyddiadau, am riportio beth oedd wedi digwydd iddi hi, ac am helpu ein ymchwiliad yn ystod cyfnod anodd ofnadwy.

“’Dwi’n annog dioddefwyr cam-drin domestig i siarad – mi wnawn ni wrando, ac mi wnawn ni ymchwilio pob hysbysiad yn drylwyr er mwyn dod â throseddwyr o flaen eu gwell.”

Ymgyrch Unite ydy’n hymateb ni er mwyn trechu trais yn erbyn merched a genethod. Mae rhagor o wybodaeth ar gael yma - Ymgyrch Unite | Heddlu Gogledd Cymru