Carcharu dyn o'r Rhyl am drais domestig a throseddau stelcian

Mae dyn 43 oed wedi cael ei garcharu ar ôl cyfaddef i drais domestig a throseddau stelcian.

Cafodd Simon Peter Murphy, o Rodfa Brynmor, Y Rhyl, ei ddedfrydu i 43 mis yn Llys y Goron yr Wyddgrug yn gynharach heddiw (dydd Gwener, 28 Chwefror).

Mewn ymddangosiad cynharach yn y llys, roedd Murphy wedi pledio'n euog i stelcian dros gyfnod o sawl mis.

Cyfaddefodd Murphy, a oedd yn torri gorchymyn peidio ag ymyrryd ar y pryd, ei fod wedi tagu'r ddynes ac wedi ei galw dro ar ôl tro o rif ffôn anhysbys er mwyn ei bygwth.

Gosododd ddyfais olrhain ar gerbyd y dioddefwr i fonitro ei symudiadau.

Digwyddodd y troseddau rhwng 21 Ebrill a 28 Mehefin 2024, ac yn ystod y cyfnod hwnnw anfonodd gyfres o negeseuon trahaus a bygythiol o broffil Facebook ffug.

Yn ystod y cyfnod hwn, cyfaddefodd Murphy hefyd i neidio ar foned car y ddynes, gan achosi difrod i'r cerbyd.

Yn ogystal â'r ddedfryd o garchar, gosododd y Barnwr orchymyn atal 20 mlynedd arno a fydd yn amddiffyn y dioddefwr ymhellach.

Dywedodd y Ditectif Gwnstabl Simon Price: "Mae stelcian yn drosedd ddifrifol a all waethygu'n gyflym ac achosi i ddioddefwr fyw mewn ofn.

"Roedd ymddygiad Murphy yn obsesiynol, yn ymosodol ac yn fygythiol ac mae wedi cael effaith ddinistriol ar y ddynes o dan sylw.

"Rwy'n gobeithio y bydd y ddedfryd hon yn caniatáu i'r dioddefwr symud ymlaen, gan wybod nad yw Murphy bellach yn fygythiad i'w diogelwch.

"Rydym yn cymryd adroddiadau o stelcian o ddifri a byddwn yn eich cefnogi drwy gydol unrhyw ymchwiliad. Os ydych chi'n profi stelcian, peidiwch â dioddef ar eich pen eich hun, rhowch wybod i ni amdano."

"Os ydych wedi dioddef stelcian neu gam-drin domestig, rhowch wybod i ni ar-lein neu drwy ffonio 101. Ffoniwch 999 mewn argyfwng bob amser."