Family tribute following Gwalchmai death

Mae teulu dynes a fu farw yn dilyn digwyddiad yng Ngwalchmai ar 6 Chwefror, wedi talu teyrnged iddi.

Roedd Emma Williams yn 47 oed ac yn byw ar Ynys Môn. Mae ei theulu wedi cyhoeddi'r deyrnged ganlynol iddi:

"Roedd Emma yn berson byrlymus, gofalgar a chariadus iawn. Roedd hi'n fam, chwaer, modryb ac yn ffrind da i gymaint o bobl.

"Roedd Emma yn caru ei mab Tommy ac yn ei garu'n ddiamod. Ef oedd y peth pwysicaf yn ei bywyd.

"I Tommy, nid ei fam yn unig oedd hi, ond hi hefyd oedd ei ffrind gorau. Roedd hi'n rhywun y gallai siarad â hi am unrhyw beth. Un o'r nifer o rinweddau yr oedd Tomi yn ei garu am ei fam oedd ei bod hi'n gallu gwneud i unrhyw un deimlo'n gyfforddus yn ei chwmni a byddai hi bob amser yn sicrhau eu bod yn gadael gyda gwên.

"Roedd Emma wrth ei bodd yn teithio a doedd hi byth yn ofni rhoi cynnig ar bethau newydd. Treuliodd lawer o wyliau yn Dubai gyda'i mab yn creu atgofion gwych.

Ychwanegodd brawd Emma, Chris: "Cafodd Emma a finnau blentyndod bendigedig, yn llawn hwyl a chwerthin. Cawsom ein bendithio â rhieni gofalgar a chariadus. Roeddem ni'n agos iawn. Roedd teulu yn bwysig iawn i Emma. Byddaf bob amser yn colli ei gwên, ei chwerthin, ei hysbryd anturus a'i hegni heintus.

Dywedodd rhieni Emma: "Cyffyrddodd Emma â chymaint o fywydau gyda'i natur garedig, ofalgar a chariadus. Roedd hi'n ffrind ffyddlon i lawer. Roedd ei synnwyr digrifwch ffraeth yn dod â chwerthin ble bynnag y byddai'n mynd. Roedd hi'n fywiog, yn allblyg ac roedd ei hegni positif yn heintus. Emma oedd calon ac enaid unrhyw ddigwyddiad; roedd hi'n gwybod sut i fyw a mwynhau pob eiliad.

"Roedd Emma yn gweithio'n galed ac roedd hi bob amser yn rhagori ar bopeth roedd hi'n ei wneud. Roedd pawb yn meddwl yn dda ohoni ble bynnag y bu hi'n gweithio.

"Er ein bod wedi ein llorio'n llwyr ac yn dal i geisio dod i delerau â cholli ein merch annwyl mor sydyn, hoffem ddiolch i'n ffrindiau a'n teulu a'r gymuned i gyd am eu cydymdeimlad didwyll sydd wedi bod yn gysur i ni i gyd."

Mae swyddogion arbenigol yn parhau i gefnogi teulu Emma yn ystod y cyfnod anodd hwn tra bod ymchwiliadau i'w marwolaeth yn parhau.