Ymholiadau'n parhau yn dilyn ymgais i ladrata yn Wrecsam

Mae ymholiadau'n parhau heddiw yn dilyn ymgais i ladrata mewn siop yn Wrecsam.

Am 1.03pm ddoe (dydd Iau, 13 Chwefror), aeth dyn i mewn i siop AM/PM ym Mrynteg gan fygwth aelod o staff am arian parod, gan honni bod ganddo wn, cyn gadael i gyfeiriad Holborn Crescent. 

Ni chafodd unrhyw beth ei ddwyn ac ni welwyd unrhyw arf yn ystod y digwyddiad.

Dywedodd y Ditectif Arolygydd Dean Jones: "Mae ymholiadau'n parhau heddiw i ddod o hyd i'r sawl sydd dan amheuaeth cyn gynted â phosib.

"Hoffwn sicrhau'r gymuned na welwyd unrhyw arf yn ystod y digwyddiad, er gwaethaf i’r dyn  honni bod ganddo un, ac nid ydym yn credu bod unrhyw fygythiad ehangach i drigolion.

"Mae'r dyn, a oedd yn cuddio ei wyneb, yn cael ei ddisgrifio fel un mawr o gorff ac yn gwisgo dillad tywyll.

"Rwy'n gofyn i unrhyw un nad yw eisoes wedi bod mewn cysylltiad â'r heddlu sy'n byw yng nghyffiniau'r siop AM / PM, a'r rhai sy'n byw ar Holborn Crescent sydd â theledu CCTV, i weld a oes tystiolaeth o'r dyn dan amheuaeth ar eu camerâu.

"Gofynnir i unrhyw un a oedd yn gyrru yn yr ardal ar y pryd ac sydd â lluniau camera cerbyd i edrych ar eu camerâu am unrhyw ymddygiad amheus."

Gofynnir i unrhyw un sydd â gwybodaeth gysylltu â ni drwy ein gwefan, neu ein ffonio ar 101, gan ddyfynnu'r cyfeirnod 25000120510.
Fel arall, gallwch gysylltu â'r elusen annibynnol Crimestoppers ar-lein yn ddienw, neu ar 0800 555 111.