Tri wedi'u harestio ar ôl i ddwy fferm ganabis fawr gael eu canfod yn Wrecsam

Arestiwyd tri ar ôl i ddwy fferm ganabis gael eu darganfod yn Wrecsam yr wythnos hon.

Ar ddydd Sul, 6 Ebrill, cafodd yr heddlu wybod am fferm ganabis soffistigedig mewn safle ar Conery Lane, Bronnington, yr Eglwys Wen.

Cyflawnwyd gwarant gan yr heddlu ac ar ôl mynd i mewn i'r adeilad, gwelwyd dros 2,000 o blanhigion y tu mewn.

Cafodd dau ddyn eu harestio yn y fan a'r lle ond maent wedi cael eu rhyddhau ers hynny.

Mae nifer o eitemau wedi'u atafaelu tra bod ein hymchwiliadau yn parhau.

Ar ddydd Mawrth, 8 Ebrill, gweithredodd swyddogion warant arall mewn safle ar Ystâd Ddiwydiannol Advance Park yn Rhosymedre a darganfod cyflenwad mawr arall.

Cafodd un dyn ei arestio ac ers hynny mae wedi cael ei ryddhau ar fechnïaeth hyd nes y bydd ymchwiliadau pellach yn digwydd.

Dywedodd Rhingyll Ardal Cynorthwyol Aled Hughes: ⁠"Fe wnawn ni barhau i dargedu'r rhai hynny sy'n achosi niwed difrifol yn ein cymunedau.  ‌​‌‌​​​‌‍‌​‌​‌​​​

"Mae ein gwaith yn taclo'r math hwn o drosedd yn dibynnu ar wybodaeth gan y cyhoedd. Nhw yn aml yw'r cyntaf i sylwi ar rywbeth amheus yn eu cymunedau. Mae adnabod, targedu a datgymalu ffermydd canabis mawr hefyd yn ein galluogi i atal troseddau mwy difrifol, ac amddiffyn y rhai sy'n agored i gael eu hecsbloetio gan hyn. ‌​‌‌​​​‌‍‌​‌​‌​​​

"Mae ffermydd canabis hefyd yn berygl difrifol i'r cyhoedd. Mae'r ynni sydd ei angen i redeg y ffermydd yn golygu bod troseddwyr yn aml yn osgoi talu amdano, sy'n achosi risg tân sylweddol."

Gall unrhyw un sydd â phryderon am gyflenwad cyffuriau yn eu hardal roi gwybod i ni trwy ein gwefan neu drwy ffonio 101, neu yn ddienw trwy'r elusen annibynnol, Crimestoppers.