Carchar i leidr wnaeth ddwyn o siopau ynghanol dinas Wrecsam

Mae dyn 32 oed wnaeth ddifrodi a cheisio dwyn oddi wrth bum busnes yn Wrecsam wedi ei garcharu.

Mi ymddangosodd Shaun Roberts, sydd heb gyfeiriad sefydlog, yn Llys Ynadon yr Wyddgrug ar ddydd Sadwrn, 12 Ebrill, lle mi gyfaddefodd fyrgleriaeth efo’r bwriad o ddwyn, dau drosedd o geisio byrgleriaeth efo’r bwriad o ddwyn, a dau drosedd o ddwyn.

Ar 29 Mawrth, mi chwalodd Roberts ddrysau blaen dwy siop ar Stryt y Banc, gan achosi difrod sylweddol, a llwyddo i gael mynediad i un ohonyn nhw.

Dim ond deuddydd yn ddiweddarach, ar 31 Mawrth, mi aeth Roberts i siop ar Stryt Yorke, a dwyn tair siaced  gwerth £867. Mi aeth staff ar ôl Roberts wrth iddo adael y siop a chael y siacedi’n ôl.

Yn ystod oriau mân 4 Ebrill, mi chwalodd Roberts ddrysau blaen dau fusnes unwaith eto, ar Strydoedd yr Eglwys a’r Bont, gan gymryd arian parod oddi wrth un ohonyn nhw.

Mi ddefnyddiodd swyddogion y systemau TCC ar draws canol y ddinas ac adnabod Roberts ymhob lleoliad yn achosi difrod drwy gydol yr wythnos.

Mi gafodd ei garcharu am 12 mis, ac mi gafodd orchymyn i dalu £1000 mewn iawndal.

Dywedodd Arolygydd Dros Dro’r Ardal, Tom Dewberry: “Mae gwarchod staff, busnesau a’u cwsmeriaid rhag y math yma o droseddoldeb yn flaenoriaeth yn ninas Wrecsam.

“’Da ni’n parhau i ymdrin yn gadarn efo troseddwyr fel Roberts, er mwyn gwarchod y rhai sy’n gweithio yn y sector manwerthu a lleihau troseddau manwerthu.

“’Dwi’n gobeithio bod busnesau canol y ddinas yn  dawel eu meddwl na all Roberts achosi rhagor o ddifrod i’r busnesau mae nhw’n gweithio mor galed ynddyn nhw, er mwyn darparu gwasanaeth i’r gymuned.”