SCCH yn cwblhau cymhwyster mewn Iaith Arwyddion Prydeinig
Cynnwys y prif erthygl
Mae SCCH gyflawnodd gwrs mewn Iaith Arwyddion Prydeinig (IAP) yn ddiweddar yn sôn am sut mae o’n elwa o’i sgiliau newydd yn barod.
Mi gymerodd ddeg swyddog a staff yr heddlu ran mewn cwrs pum wythnos rhwng 11 Mawrth a 8 Ebrill, ac o ganlyniad ennill cymhwyster lefel un IAP.
Mae SCCH Jack Mitchelmore wedi manteisio ar y cyfle i ddefnyddio’i sgiliau newydd yn y gymuned yn barod. Dywedodd: “Fel SCCH, ‘dwi angen meithrin perthnasau cryf ac ymgysylltu efo pob aelod o'r gymuned.
“Mae’r cwrs hwn wedi rhoi’r hyder i mi gyfathrebu’n well efo a chynorthwyo’r rhai yn y gymuned fyddar, hefyd.”
Wedi cwblhau’r cwrs, mi gyflwynwyd y staff a’r swyddogion efo bathodynnau i’w gwisgo tra’n gweithio, er mwyn dangos eu bod wedi cael hyfforddiant IAP.
Mi barhaodd Jack: “’Dwi wedi gallu ymarfer yr hyn wnes i ei ddysgu’n barod ar ddau achlysur wrth fod allan ar batrôl.
“Yn gyntaf, yn defnyddio arwyddion efo rhiant a’u plentyn, ac yna eto efo teulu o Birmingham oedd yn ymweld â Llanberis efo’u mab byddar.
“Ar y ddau achlysur, mi ‘roedd y teuluoedd wedi’u synnu at fy ngwybodaeth sylfaenol o’r iaith, ac mi wnaethon nhw fy annog i barhau efo’r dysgu.
“Mae medru cael sgwrs sylfaenol yn gwneud gwahaniaeth mawr er mwyn gwneud i rywun deimlo’u bod yn cael eu clywed a’u deall.”
Mi gynhaliwyd y cwrs mewn partneriaeth efo Grŵp Llandrillo Menai. Mi ddatblygodd y tiwtoriaid IAP arbenigol gwrs wedi’i ddylunio’n benodol ar gyfer senarios plismona, gan sicrhau bod swyddogion yn cael sgiliau y gallan nhw’u defnyddio yn eu gwaith bob dydd.
“Mi hoffwn ddiolch yn fawr i David ac Abi o Goleg Llandrillo Menai am wneud y cwrs mor ddifyr ar gyfer fy nghydweithwyr a minnau.
“’Dwi’n edrych ymlaen at ddefnyddio fy sgiliau newydd eto’n fuan, er mwyn datblygu fy ngwybodaeth a dealltwriaeth o IAP ymhellach.”
Yn dilyn llwyddiant y cwrs cyntaf, mi fydd cyrsiau IAP pellach yn cael eu cyflwyno yn y misoedd nesaf, er budd pellach i aelodau o’r gymuned fyddar ledled Gogledd Cymru.
‘Da ni’n recriwtio Swyddogion CCH i ymuno efo Heddlu Gogledd Cymru rŵan. Os ‘da chi’n angerddol ynglŷn â gweithio yng nghalon y gymuned, efallai mai hon ydy’r swydd i chi. Ymgeisiwch drwy ein gwefan heddiw.