Gwaith partneriaeth er mwyn adnewyddu Bangor yn parhau

Mae swyddogion yn parhau efo’r gwaith efo partneriaid, er mwyn creu newid cadarnhaol ar Stryd Fawr Bangor.

Mi gynhaliwyd ymweliadau ar y cyd i 10 busnes ynghanol y ddinas, fel rhan o’r fenter amlasiantaeth, Adnewyddu Bangor. Ei nod ydy mynd i’r afael â materion wedi’u nodi gan y gymuned leol, gan gynnwys cyflenwi cyffuriau, graffiti, ymddygiad gwrthgymdeithasol, yfed ar y stryd a thrais rhywiol.

Mi weithiodd yr heddlu efo cydweithwyr o’r gorfodaeth mewnfudo, Gwasanaeth Tân ac Achub Gogledd Cymru, a swyddogion Safonau Masnach a Gorfodaeth Cartrefi Cyngor Gwynedd, er mwyn ymgysylltu efo busnesau ynglŷn â’r fenter, a gwirio cydymffurfiaeth efo ymarferion cyfreithlon.

O ganlyniad i’r ymgyrch, mi dderbyniodd dau eiddo orchmynion troi allan oherwydd torri amodau preswyl a thorri rheoliadau tân.

Dywedodd Rhingyll Liam Carr: “’Da ni’n parhau i weithio’n agos efo nifer o bartneriaid er mwyn gwneud Bangor yn le diogel i fyw, gweithio ac ymweld.

“Yn gyffredinol, ‘da ni’n falch o weld bod y rhan fwyaf o fusnesau yn cael eu rhedeg mewn modd cyfreithlon a diogel, ac yn gefnogol o’r nod o greu newid cadarnhaol ar y Stryd Fawr.

“Mi gaiff Adnewyddu Bangor yr effaith fwyaf os ‘da ni’n parhau i weithio efo’n gilydd, ac mi fuaswn i’n annog preswylwyr i gysylltu efo ni efo unrhyw bryderon sydd ganddyn nhw ynglŷn â’r Stryd Fawr neu’r ddinas ehangach.”

Dylai unrhyw un efo pryderon neu faterion ynglŷn â Stryd Fawr Bangor gysylltu efo’r heddlu, neu’r asiantaethau partner perthnasol.