Ymgyrch trawsffiniol yn targedu troseddu ar draws Sir y Fflint a Swydd Gaer yn gweld canlyniadau rhyfeddol

 

Ddoe ymunodd Heddlu Gogledd Cymru hefo Heddlu Swydd Gaer a'i bartneriaid ar gyfer ymgyrch a oedd yn targedu troseddu ar draws y ddwy ardal. 

Ddydd Iau, 24 Ebrill, targedodd swyddogion o dimau arbenigol amrywiaeth o fathau o droseddau gan gynnwys troseddau difrifol a threfnedig a throseddau traffig ffyrdd ar draws y ffin rhwng y ddwy sir. 

Yn ystod yr ymgyrch hefyd roedd partneriaid o sawl sefydliad yn gweithio hefo'i gilydd er mwyn mynd i'r afael â throseddoldeb ac aflonyddu arno, yn enwedig y rhai sy'n teithio rhwng Sir y Fflint a Chaer, wrth ddarparu presenoldeb tawel i'r cyhoedd a pherchnogion busnes.  

 

Roedd gweithgareddau arwyddocaol ar draws y ddau faes yn cynnwys: 

• Chwe arestiad yn Sir y Fflint am feddiant hefo'r bwriad o gyflenwi, gyrru a hwythau wedi'u gwahardd a thair trosedd mewnfudo.  

• Stopio cerbydau nwyddau trwm ar bont bwyso Ewlo hefo'r Asiantaeth Gwasanaethau Cerbydau a Gweithredwyr (VOSA) yn gwirio am droseddau gorlwytho, a'r Biwro Yswirwyr Moduron yn nodi trwyddedau gyrru twyllodrus. 

• Patrolau amlwg iawn ar droed ac mewn cerbydau ar draws y ddwy ardal, gan arwain at sawl achos o stopio a chwilio yn Sir y Fflint. 

• Ymweliadau timau Safonau Masnach, Gorfodi Mewnfudo a chamfanteisio ar draws y ddwy ardal, gan gynnwys golchi ceir, bariau ewinedd a bwytai.  

• Defnyddio dronau. 

• Defnyddio faniau GanBwyll.  

• Biwro Yswiriant Modur yn nodi trwyddedau gyrru twyllodrus. 

• Cynhaliwyd ymweliadau trwyddedu ar draws Sir y Fflint a Swydd Gaer er mwyn gwirio bod eiddo'n cydymffurfio hefo amodau trwyddedu. 

• Mae Tîm Troseddau Cefn Gwlad Heddlu Gogledd Cymru yn cael eu gosod hefo Tîm Troseddau Cefn Gwlad Heddlu Swydd Gaer er mwyn cynnal gwiriadau mewn perthynas â cherbydau amaethyddol a threlars. 

• Cynnal patrolau trosedd amlwg iawn a chudd yng nghanol dinas Caer hefo ymgysylltiad da hefo'r cyhoedd. 

• Chwe gwarant yn targedu cŵn XL Bully yn Swydd Gaer, gan arwain at atafaelu dau.  

• Cynhaliwyd trwyddedu tacsis mewn partneriaeth hefo Cyngor Gorllewin Swydd Gaer a Chaer. Roedd yn cynnwys stopio 26 o dacsis er mwyn gwneud yn siŵr eu bod nhw'n cydymffurfio hefo rheoliadau, ac fe gafodd un ei atafaelu gan nad oedd ganddynt yswiriant.  

• Y Tîm Troseddau Seiber yn ymgysylltu hefo'r cyhoedd yng nghanol dinas Caer. 

• Cafodd Uned Chwilio Tanddwr y Gogledd Orllewin ei hanfon i Bont Cow Lane ar gyfer chwilio'r gamlas yn rhagweithiol am eitemau anghyfreithlon a allai fod wedi'u taflu. Cafodd tri ffôn symudol eu casglu, ac fe gynhaliodd swyddogion hefyd batrôl o'r gamlas er mwyn rhoi presenoldeb tawel ac atal unrhyw droseddu. 

• Mae dwy fan canfod cyflymder wedi'u defnyddio yn ardal Caer yn cynnal gweithgarwch gorfodi cyflymder, gan allu adnabod platiau rhif yn awtomatig yn llonydd.   

• Tasglu Llinellau Cyffuriau Heddlu Trafnidiaeth Prydain wedi'i ddefnyddio hefo Tîm Rhagweithiol Caer yng Ngorsaf Reilffordd Caer ac i ardal ehangach Caer.  

• Y Tîm Ffyrdd a Throseddau yn stopio cerbydau er mwyn targedu troseddwyr trawsffiniol ar hyd yr A55, yr M56, yr M53 a'r ffyrdd cyfagos.  

Yn ystod y dydd, stopiwyd nifer sylweddol o gerbydau ar draws y ddwy ardal.  

Roedd troseddau traffig yn cynnwys tri cherbyd wedi'u gorlwytho yn teithio ar y ffyrdd, gan gynnwys un yn cario Ferrari ar gefn llwythwr isel. 

Cafodd pum cerbyd arall eu hatafaelu yn ystod y dydd, gan gynnwys dau gar yn cael eu gyrru heb yswiriant, beic ffordd a welwyd ar gefn un olwyn o flaen swyddogion, beic oddi ar y ffordd ac e-sgwter. 

Cafodd dau eu harestio am yrru ar gyffuriau yng Nghaer, tra di-rymwyd trwydded yrru ar unwaith am olwg gwael yn Sir y Fflint.  

Rhoddwyd cyfanswm o 22 adroddiad troseddau traffig (TORs) ar draws y ddwy ardal, am resymau gan gynnwys defnyddio ffonau symudol, dim gwregys diogelwch, diffygion hefo cerbydau, goryrru, a gyrru heb yswiriant.  

Atafaelwyd sawl fêp anghyfreithlon o un siop yn Sir y Fflint, cyn i lawer iawn o dybaco a sigaréts wedi'u rholio â llaw anghyfreithlon gael eu darganfod yn y llofft.  

Roedd hynny ar ôl ymdrin hefo un ddynes am droseddau mewnfudo mewn bar ewinedd yn y Fflint, tri arestiad am aros yn hirach nag yr oedd eu VISA yn caniatáu, a dau arestiad am weithio'n anghyfreithlon. Cyflwynwyd hysbysiad atgyfeirio hefyd ar gyfer cosb sifil bosibl yn erbyn y busnes. 

Dywedodd Wes Williams, Arolygydd Gogledd Sir y Fflint: "Lansiwyd yr ymgyrch hon i fynd i'r afael â throseddau difrifol a threfnedig ar draws Gogledd Cymru a Swydd Gaer ac i roi sicrwydd i'r cyhoedd ein bod ni allan yna ac ein bod ni ar gael. 

"Trwy gyfuno adnoddau, cudd-wybodaeth, a grymoedd gorfodi'r heddlu ac asiantaethau partner, fe wnaethon ni gyflawni ein prif amcan o gydweithio'n agos hefo'n cydweithwyr yn Heddlu Swydd Gaer er mwyn aflonyddu ar droseddwyr trawsffiniol. 

"'Da ni wedi ymroi o hyd gweithio hefo heddluoedd cyfagos er mwyn ymlid troseddwyr. Hefo'n gilydd, fe wnawn ni barhau gwneud Gogledd Cymru'r lle mwyaf diogel i fyw, gweithio ac ymweld ag o. 

"Dwi'n gobeithio fod yr ymgyrch hon wedi tawelu meddwl trigolion y gwnawn ni bopeth a allwn ni er mwyn gwarchod y cyhoedd 'da ni'n eu gwasanaethu nhw a thynnu'r rhai hynny sy'n troseddu oddi ar ein strydoedd ni."  

 

Dywedodd Arolygydd James Wilson, o Uned Plismona Lleol Caer, Heddlu Swydd Gaer: "Trwy gydol y dydd fe wnaethon ni ddefnyddio llu o dactegau er mwyn aflonyddu ar weithgarwch troseddol yng Nghaer a Gogledd Cymru. Ond mae'n bwysig nodi bod y ddau heddlu yn defnyddio'r rhain yn rheolaidd fel rhan o'n tactegau plismona bob dydd ni. 

"Yn ogystal â bod yno i ganfod ac atal trosedd, roedd yr ymgyrch yn gyfle i ymgysylltu hefo'r cyhoedd a thynnu sylw at yr hyn 'da ni'n ei wneud er mwyn cadw ein cymunedau'n saff. 

"Mae ymgyrchoedd a phartneriaeth cydweithio hefo heddluoedd eraill mor bwysig. Mae'n dangos ein bod ni wedi ymrwymo gwneud popeth o fewn ein gallu ni fynd i'r afael ag ymddygiad troseddol yn uniongyrchol a sicrhau bod y ffin rhwng Swydd Gaer a Gogledd Cymru yn parhau bod yn lle gelyniaethus i droseddwyr. 

"Dwi'n edrych ymlaen at ymgyrchoedd pellach fel hyn yn y dyfodol."