Plentyn yn marw yn dilyn gwrthdrawiad ar wersyll ym Metws Garmon ger Caernarfon

Mae plentyn wedi marw yn dilyn gwrthdrawiad ar safle gwersylla ger Caernarfon yn gynharach heddiw (dydd Llun, 28 Ebrill).

Mi dderbyniodd Heddlu Gogledd Cymru alwad 999 am 10:20 yn riportio gwrthdrawiad yn ymwneud â merch flwydd oed a cherbyd ar safle carafanau a gwersylla Bryn Gloch ym Metws Garmon.

Mi anfonwyd y gwasanaethau brys i'r lleoliad - gan gynnwys yr Ambiwlans Awyr, ac mi gafodd y plentyn ei chludo i Ysbyty Alder Hey yn Lerpwl.

Er gwaethaf ymdrechion gorau pawb yn gysylltiedig, bu farw'r plentyn yn yr ysbyty'r prynhawn yma.

Mae'r Crwner wedi cael gwybod.

Dywedodd Rhingyll Simon Hughes o Uned Troseddau'r Ffyrdd: "'Da ni'n estyn ein cydymdeimlad at deulu'r ferch yn ystod y cyfnod anodd hwn. Byddan nhw rŵan yn cael eu cynorthwyo gan Swyddog Cyswllt Teulu, sydd wedi'u hyfforddi'n arbennig.

"Mae'r ymchwiliad i sefydlu achos y gwrthdrawiad ar y gweill ac mi hoffwn ddiolch i bawb wnaeth helpu ar y safle heddiw."

Nid ydy Heddlu Gogledd Cymru yn gallu rhyddhau rhagor o fanylion ar hyn o bryd.