Dynion wedi’u dedfrydu am ymyrryd â daear moch daear yng Ngwynedd

Mae dau ddyn wedi eu dedfrydu am ymyrryd â daear moch daear.

Mi achosodd Anthony Lloyd Wilkinson, 29 o Ffordd Rhedyw, Llanllyfni, a Stephen Lee Jones, 33 o Stad Bro Rhos, Bethel, i gi fynd i ddaear moch daear, ac mi gafodd ei ddifrodi o ganlyniad.

Mi ddigwyddodd yng Ngarndolbenmaen, Gwynedd, ar 7 Ionawr eleni.

Mi wnaeth ymholiadau arwain yr heddlu at ddau unigolyn o dan amheuaeth, ac yno mi gyflawnwyd gwarantau chwilio mewn dau gyfeiriad o dan y Ddeddf Bywyd Gwyllt a Chefn Gwlad 1981.  O ganlyniad, mi gafodd ddau gi eu hatafaelu o dan y Ddeddf Lles Anifeiliaid.

Mi wnaeth Wilkinson a Jones gyfaddef y cyhuddiadau o ymyrryd â ac achosi difrod i ddaear moch daear, ac mi ymddangosodd y ddau gerbron Llys Ynadon Llandudno ar ddydd Mercher 16 Hydref, ar gyfer dedfryd.

Mi dderbyniodd y ddau ddedfryd i’r carchar am 12 wythnos, sydd wedi’u gohirio am flwyddyn.

Maen nhw hefyd wedi eu gwahardd rhag cadw cŵn am bedair mlynedd, ac wedi cael gorchymyn i dalu £600 yr un tuag at y RSPCA.

Mae’r mochyn daear yn rywogaeth warchodedig, ac mae’n anghyfreithlon i’w ladd, anafu neu ei ddal, neu i ymyrryd â’i ddaearau.

Dywedodd y swyddog ymchwilio, PC Matt Raymond: “Mae’r gyfraith er mwyn gwarchod moch daear yn bodoli am reswm da, a ‘da ni’n cymryd pob hysbysiad o ddifri.

“Fel arfer, mae troseddau o’r math yma yn anodd i’w rhoi gerbron y llys oherwydd nad ydyn nhw’n rhai cyffredin, felly ‘dwi’n croesawu’r canlyniad yma, sydd hefyd yn arddangos pwysigrwydd y gwaith partneriaeth sydd gennym ni efo’r RSPCA pan yn ymchwilio i droseddau cefn gwlad.

“Ni wnawn ni oddef troseddau cefn gwlad o’r fath, ac mi fydden nhw’n cael eu hymchwilio, a chael eu trin yn llym yn y llys.”